Esti 6 d’avientu conmemórase’l 44 aniversariu d’aprobación de la Constitución Española. Nesti aniversariu, Iniciativa pol Asturianu quier aprovechar pa facer, un añu más, un llamáu a los partíos políticos asturianos pa llograr l’acuerdu constitucional pal futuru de les llingües d’Asturies.
Iniciativa pol Asturianu lleva utilizando en diferentes campañes, alcuentros y actos el so lema ‘Oficialidá, el camín constitucional de futuru pal asturianu’ que resume, en definitiva, el valor constitucional de trabayu en defensa de les llingües d’Asturies amparáu pola llei cimera nel sistema xurídicu español. Nesi sen, la organización considera qu’esti añu 2023 que ta a piques d’entamar ye una ocasión perfecta pa llograr el consensu constitucional pol idioma. “El resultáu de les elecciones de 2023 tien que ser el consensu, l’alcuentru y la suma de voluntaes pa llograr salvar l’idioma y da-y el mesmu rangu llegal que’l restu de les llingües d’España” declara la entidá.
La organización apunta que “44 años depués de l’aprobación de la Carta Magna ye’l momentu de da-y cumplimientu constitucional al artículu 3.2 n’Asturies que significa la declaración d’igualdá pa tola ciudadanía independientemente de la llingua que llibremente quiera utilizar”.
Iniciativa pol Asturianu recuerda amás que “los valores constitucionales tamién declaren la igualdá ente tolos ciudadanos del Estáu Español, independientemente de la llingua que s’utilice, amás de la non discriminación. Esto ye, en definitiva, garantizar la igualdá de tolos españoles. Si un falante de gallegu quier usar la so llingua en diferentes situaciones, ¿por qué non un asturfalante?”.
