Iniciativa pol Asturianu reclama al Alministrador d’Infraestructures Ferroviaries (Adif) que de marcha atrás nos sos planes y reponga de forma inmediata los cartelos de la estación de tren de La Pola, nel conceyu de Ḷḷena. La entidá considera inxustificable que la empresa pública reemplace los cartelos de los andenes cola forma tradicional y oficial ‘La Pola’ por otros cola forma deturpada ‘Pola de Lena’.
La organización de reivindicación llingüística esplica que les señales nueves incumplen la llexislación vixente en materia de toponimia qu’establez la Llei 1/98, de 23 de marzu, d’Usu y Promoción del Bable/Asturianu y defende que los cambeos previstos na estación ḷḷeniza p’adaptase a la alta velocidá ferroviaria nun pueden suponer pasos atrás nel so usu.
La entidá recuerda que’l Conceyu de Ḷḷena foi unu de los primeros n’oficializar la toponimia tradicional. El Gobiernu del Principáu d’Asturies remató esi procesu nel añu 2005, cuando s’aprobó’l Decretu 74/2005, de 7 de xunetu, pol que se determinen los topónimos oficiales del Conceyu de Ḷḷena. Dende esi momentu la única forma oficial pa referise a la capital del conceyu ye ‘La Pola’.
Nesi sen, Iniciativa pol Asturianu encamienta a Adif a rectificar y reponer los cartelos retiraos o iguar los nuevos p’adecuar la señalética a lo que recueye’l decretu de toponimia. La organización afala a la entidá pública a poner más procuru nel cumplimientu de la toponimia oficial en toles infraestructures de la so rede n’Asturies. L’asociación tamién treslladó la so esmolición a la viceconseyería de Cultura, Política Llingïística y Deporte, y insta a la viceconseyera a recordar a Adif la obligación de respetar la toponimia tradicional y oficial asturiana.
