Un añu más Iniciativa pol Asturianu participó de les actividaes de la Universidá Asturiana de Branu (UABRA) entamada pola Academia de la Llingua Asturiana, la Universidá d'Uviéu y el Conceyu de Cangas del Narcea. Dellos socios y otres persones collaboraron pa poner en marcha un puestu informativu y de venta de llibros y otros productos que sirven pa recaldar fondos pa la entidá.

 

Como ye vezu nestos cursos, Iniciativa pol Asturianu entamó una actividá lúdica pa dase a conocer ente l'alumnáu y promocionar l'usu del asturianu. Anguaño celebróse'l miércoles 30 de xunetu. Foi un concursu "Pasopallabra" colos alumnos de la UABRA. Basáu nel esitosu programa de televisión, el concursu va fízose na Disco Zaycor, baxo la coordinación d'Alba Llaneza, miembru d'Iniciativa pol Asturianu. Foi una nueche na que los alumnos esfrutaron y pudieron divertise alredor de la llingua asturiana, con delles pruebes y premios pa los ganadores.

 

Na segunda selmana de los cursos, amás de siguir col puestu informativu y la campaña de captación de socios, Iniciativa pol Asturianu organizó una visita del equipu d'Alderiques d'Asturies, el proyectu televisivu de la entidá en collaboración con otres organizaciones, pa grabar un interesante y completu reportaxe de l'actividá de la UABRA, incluyendo entrevistes col director de los cursos, Xosé Antón González Riaño, asina como con profesores y alumnáu de la UABRA.

 

Dende Iniciativa pol Asturianu volvemos a dar les gracies a l'Academia de la Llingua Asturiana poles facilidaes y a tolos alumnos y alumnes de la UABRA pol so interés y collaboración con toles actividaes entamaes esti añu.

 

Semeyes de la presencia d'Iniciativa pol Asturianu na UABRA 2014

Artículos venceyaosMás del autor