La Conseyería d’Educación nun dio les hores necesaries al IES Santa Cristina de L.lena, y un alumnu denuncia que queda ensin Llingua Asturiana en Bachilleratu

Iniciativa pol Asturianu recibió la denuncia d’un alumnu del IES Santa Cristina de L.lena al que se-y negaba, xunto otru compañeru, la posibilidá de cuntar cola asignatura d’asturianu, tal y como garantiza la Llei d’Usu del asturianu de 1998 y una sentencia del Tribunal Superior de Xusticia d'Asturies, derivándolu a otra asignatura. Nesti casu la responsabilidá paez venir de la falta d’hores de profesoráu d’asturianu otorgaes al centru dende la Conseyería y tamién del desconocimientu del centru de la posibilidá del IES de pidir una ampliación de xornada, polo que dende esta organización se-y encamentó al alumnu reclamar tanto al centru como al propiu Conseyeru d’Educación.

Somos conocedores de qu’esta situación nun ye única, y que munchos centros tienen una insuficiente cantidá d’hores del profesoráu d’asturianu, tanto nel sistema públicu como nos centros concertaos, lo que fai que los contratos pal profesoráu d’asturianu seyan n’ocasiones d’hora y media a la selmana, o que los grupos de Llingua Asturiana axunten hasta 30 alumnos de distintos niveles y grupos.

 

Iniciativa pol Asturianu pidió a la Conseyería d’Educación que se buscara solución a esti casu concretu, y paez que tres la nuesa quexa y la del alumnu, la situación ta en camín de solucionase. Sicasí, la situación xeneral que xenera la escasa dotación pa impartir l’asignatura de Llingua Asturiana y la precarización de la formación que supón, precisa de buscar soluciones que xeneralicen la presencia de l’asignatura ensin esti tipu de torgues cada comienzu de cursu.

 

Amás, aprovechamos pa recordar a les families y a los centros que nun hai sistema de ratio mínimu d'alumnos matriculaos pa poner clases d'asturianu. Esti sistema illegal de ratio mínimu foi derogáu pola sentencia confirmatoria de la Sala de lo Contencioso-Alministrativo, Estaya Cuarta, del Tribunal Supremu, con fecha 24 d'abril del 2012.

Pidimos de nuevo que nun haya nengún alumnu ensin accesu a l’asignatura en nengún centru públicu o concertáu d’Asturies, tal y como establez la llei. Nun pue ser qu’un alumnu que quiera estudiar asturianu tenga que pasar per procesos de reclamación que convierten la matrícula nun actu de resistencia cívica, sinón que tienen que se poner toles facilidaes.