Iniciativa pol Asturianu llamenta la vergoñosa presencia del asturianu nos actos de celebración d’esti día
Iniciativa pol Asturianu quier amosar el so refugu al tratu discriminatoriu al idioma asturianu que ta acabante recibir tres asoleyase’l cartelu del Día d’Asturies entamáu pol Gobiernu del Principáu.
La celebración oficial del Día d’Asturies, qu’esti añu sedrá en Candás, cunta con un cartelu promocional onde l’asturianu, pese a tar presente, figura de manera ñidiamente marxinal, con una fonte de muncho menor tamañu y d’un color perclaru que dificulta a les clares la so llexibilidá, mentanto que la información en llingua castellana ye bien visible en tamañu y color. Paez que’l Gobiernu d’Asturies quixere esconder la llingua asturiana, en llugar d’amosala con arguyu nun día como esti, qu’habría ser de celebración de lo propio.
Iniciativa pol Asturianu quier asina denunciar que ye responsabilidá del Gobiernu del Principáu d’Asturies non solo l’usu normalizáu del idioma nos sos actos oficiales, sinón evitar que la so presencia seya arrequexada o aneudótica. Poro, pidi al Gobiernu del Principáu qu’esti seya l’últimu añu nel que l’asturianu nun seya protagonista de los actos, y la futura presencia de la información en llingua asturiana con, pelo menos, la mesma visibilidá que la información en castellán. Una políticia qu’habría siguise tol añu, pero que manca especialmente cuando se fai en día tan importantes p’Asturies y pa la divulgación de la nuesa cultura y llingua, como esti.
Iniciativa pol Asturianu quier aprovechar esti día p’animar a los asturianos y asturianes a reflexonar sobre’l futuru del idioma, que tien la so meyor política de normalización en que los propios ciudadanos usen la so llingua en tolos ámbitos de la vida, con normalidá y arguyu. Nun podemos dexar de felicitar el Día d’Asturies a tolos asturianos, colos meyores deseos y esperando que seya un día que sirva pa la recuperación del autoestima de la nuesa sociedá sobre los sos propios elementos identitarios, que tienen a la llingua asturiana como la so canal d’espresión.
