Iniciativa pol Asturianu, que yá denunció va unes selmanes el pieslle del Serviciu de Normalización del Conceyu de Llaviana, quier amosar la so postura contraria a les decisiones tomaes agora no que s'anunció como reapertura del mesmu. El Conceyu de Llaviana va reabrir el Serviciu de Normalización esternalizándolu con una empresa, renunciando a les ayudes que da la Conseyería de Cultura y con namás 9 hores selmanales, lo que ye insuficiente dafechu pa desarrollar verdaderes acciones de normalización. Esta decisión demuestra la falta de compromisu del equipu de gobiernu socialista cola normalización del asturianu.

 

Amás, al esternalizase'l Serviciu de Normalización Llingüística, sacándolu de la estructura del Conceyu, ta rebaxándose la categoría y les posibilidaes de trabayu d'esti organismu dientro de l'actividá diaria de Llaviana.

 

Reclamamos al alcalde, Adrián Barbón, que rectifique esta decisión y recupere'l SNL como lo que yera hasta agora, un órganu del Conceyu al que s'accedía pa trabayar al traviés de sistemes d'accesu a puestos de trabayu públicos. El SNL de Llaviana fixo un importante llabor y permitía a ciudadano, empreses y asociaciones llavianes cuntar con un serviciu d'asesoramientu llingüísticu.