La organización Iniciativa pol Asturianu quier denunciar la llamentable situación vivida díes atrás, cuando'l vocal de volutariáu de la organización, Xurde García Cilleros, acudió al Rexistru del Ayuntamientu d'Uviéu pa solicitar un espaciu na cai, con un documentu redactáu n'asturianu. El funcionariu que lu atendió negó-y la posibilidá d'entregalu n'asturianu y obligólu a preparar el documentu en castellán.

 

La Llei d'Usu del Asturianu de 1998, que reconoz el drechu de los asturianos a dirixise a l'alministración n'asturianu de pallabra y per escrito, xunto a otres disposiciones llegales como la Constitución o la Carta Europea de les Llingües Minoritaries, roblada por España, reconoz el drechu de los ciudadanos a nun ser discriminaos pol usu de la so llingua propia. Ye por ello que dende Iniciativa pol Asturianu entendemos esti fechu como una grave discriminación inxustificable.

 

La organización presentó una quexa nestos términos énte'l propiu Ayuntamientu d'Uviéu y énte la Procuradora Xeneral d'Asturies, solicitando que nun vuelva a repitise un fechu como esti, que xenera indefensión xurídica ente la ciudadanía qu'opta por espresase n'asturianu y que ye una verdadera marxinación social d'una parte de la sociedá asturiana.

 

Aprovechamos amás pa solicitar la presencia del asturianu nos actos organizaos pol Ayuntamientu, que siendo capital d'Asturies escaez siempres l'usu del asturianu, cuando nun supón nengún gastu estra la rotulación billingües en cartelos y material informativu de campañes, fiestes y otres actividaes. 

 

L'Ayuntamientu d'Uviéu vive dafechu d'espaldes al usu del asturianu, siendo unu de los ayuntamientos asturianos con más medios y posibilidaes pa promocionar l'asturianu. Iniciativa pol Asturianu prevé aconceyar tamién coles fuercies polítiques de gobiernu y oposición pa solicita-yos actuaciones que lleven a l'aprobación d'una ordenanza municipal d'usu del asturianu, qu'evite casos como'l denunciáu pola organización y afale una mayor presencia del idioma nel día a día de los ciudadanos, amás de siguir alantre col procesu de recuperación de la toponimia asturiana, que ta paralizáu dende va años n'Uviéu, siendo ún de los pocos conceyos de gran población que tovía nun oficializarón la so toponimia tradicional.