Iniciativa pol Asturianu denunció esti vienres la falta de compromisu llingüísticu de Radiotelevisión Española (RTVE) cola promoción y normalización del asturianu, tres analizar les respuestes oficiales remitíes pol ente públicu a unes recién preguntes parlamentaries del diputáu de Sumar por Asturies, Rafael Cofiño.
A entamos de febreru, el representante asturianu comprometióse nun conceyu con Iniciativa pol Asturianu a treslladar al Congresu delles demandes de la organización sobre la presencia de les llingües propies d’Asturies nel ente públicu estatal.
Sicasí, dende Iniciativa pol Asturianu consideren que les respuestes del presidente de RTVE, José Pablo López, “nun concreten nengún compromisu nin apuesten por avances claros” na creación de conteníos n’asturianu.
La presidenta de la organización, Arantza Margolles, calificó la contestación de “xenérica” y criticó l’ausencia de “midíes concretes nin calendariu definíu”, lo que, a so xuiciu, “confirma la falta d’una política activa pa incorporar l’asturianu de manera estable na programación y nos distintos soportes de RTVE”.
Margolles señaló amás que “idiomes con protección xurídica y estatutaria pero esin estatus d’oficialida entá, como l’asturianu o l’aragonés, queden fuera de los avances llingüísticos que se tán produciendo en RTVE”. Nesti sentíu, recordó la puesta en marcha en ochobre del añu pasáu de La 2 Cat, una canal íntegramente en catalán y qu’apuesta pola diversidá llingüística. “L’asturianu, pola falta d’oficialidá, nun puede quedar en segundu llugar. Si RTVE quier reforzar el so compromisu cola diversidá llingüística, tien que tratar a toles llingües por igual. L’apueste de RTVE por La 2 Cat ye un exemplu valiente de compromiso cola diversidá llingüstica”, afirmó.
El colectivu considera “inaceptable” que RTVE siga eludiendo la so responsabilidá como serviciu públicu estatal y quedando en declaraciones probes que nun se traducen n’avances reales pa la llingua asturiana y l’eonaviegu.
La organización considera que les respuestes del ente públicu nun inclúin compromisos concretos en cuestiones clave como l’aumentu de conteníos n’asturianu en radio y televisión, la presencia regular nos informativos autonómicos de Panorama Rexonal, el desenvolvimientu de conteníos dixitales o la dotación presupuestaria y planificación estratéxica.
A xuiciu de la entidá, esta falta de concreción y de voluntá xenera una situación de desigualdá respeuto a otres llingües del Estáu con presencia estructurada en RTVE.
“L’asturianu nun puede siguir siendo tratáu como una llingua de segunda. RTVE tien que ser un faru de defensa de los idiomes y de les cultures nun momentu nel que nun hai presencia de les diferentes llingües nes plataformes dixitales escepto del castellán”, remarcaron, al tiempu que recordaron que la diversidá llingüística ye un valor reconocíu constitucionalmente nel artículu 3.3 de la Carta Magna que l’ente públicu tien de garantizar.
La representante del colectivu de defensa del asturianu tamién llamentó les repuestes del director sobre l’usu de la toponimia oficial que nun s’axunten a la realidá. Hai dellos casos, como Xixón que cumple venti años de revisión toponímica y RTVE sigue utilizando únicamente la toponimia deturpada.
Finalmente, Iniciativa pol Asturianu quier agradecer a Rafael Cofiño la defensa del asturianu y el cumplimientu de los compromisos y anuncia que va treslladar esta situación a los y les diputades asturianes y a la Conseyería de Cultura, Política Llingüística y Turismu col oxetivu de sumar apoyos institucionales. La organización busca un compromisu específicu, públicu y con una temporalización pa la incorporación del asturianu en RTVE, asina como la creación d’espacios informativos y culturales estables y la so inclusión na estratexa dixital del ente.
