Los alcuerdos ente la FSA-PSOE ya Izquierda Xunida incluyíen una meyora de la precaria situación del asturianu na RTPA, pero les convocatories acabante asoleyar pola RTPA pal procesu de selección de los nuevos cargos directivos demuestren que nada se ta cumpliendo nesti ámbitu, pues nin la conocencia del asturianu nin el trabayu nesti ámbitu se tienen en cuenta nes bases regulardores pa escoyer al nuevu xefe d'informativos y deportes, xefe de medios dixitales y xefe d'antena.

 

Esiximos de nuevo que les bases que como'l tribunal de seleccion -del que nada nun sé sabe- tengan en cuenta'l compromisu llingüísticu de los candidatos y valga polo tanto pa cuntar con persones dispuestes a que la RTPA funcione como una ferramienta de normalización social del asturianu, tal y como esiximos que se recueya nel Mandatu Marcu pa la RTPA de viniente década, qu’espublizamos va unos meses.

 

Pidimos a Izquierda Xunida que faiga cumplir los alcuerdos firmaos y al Gobiernu que cumpla colos sos compromisos. Agora que la RTPA cumplió diez años, ye un bon momentu pa da-y una utilidá social mayor, como espaciu pa meyorar el prestixu social del asturianu, lo que dende llueu averaría la canal más a la población asturina, tal y como demuestren los bonos resultaos de los escasos conteníos n'asturianu de la corporación pública.