“La oficialidá ye la garantía constitucional pa llograr la igualdá de drechos llingüísticos entre falantes de diferentes llingües n’Asturies”
“Pa Iniciativa pol Asturianu, defender la oficialidá ye sinónimu de defender el cumplimientu de la Constitución Española”
XIXÓN, 6 D’AVIENTU DE 2019. Iván Llera, presidente d’Iniciativa pol Asturianu, fizo unes declaraciones esti 6 d’avientu, Día de la Constitución Española, pa recordar que la oficialidá de la llingua asturiana ye un midida que recueye la Carta Magna nel so artículu 3.2. Nesi sentíu, el presidente de la organización recordó que “d’un tiempu p’acá venimos trabayando col eslogan ‘Oficialidá: el camín constitucional de futuru pal asturianu’ porque creemos qu’esta midida constitucional ye la manera de garantizar la igualdá de drechos ente los falantes de les diferentes llingües qu’hai n’Asturies”.
“Pa Iniciativa pol Asturianu, defender la oficialidá ye sinónimu de defender el cumplimientu de la Constitución Española y defender la oficialidá ye, tamién, sinónimu d’apostar pola igualdá ente falantes y de defender la llibertá” recalcó’l presidente d’Iniciativa pol Asturianu.
Llera apuntó que “hai una mayoría parllamentaria a favor de la oficialidá y dende Iniciativa pol Asturianu invitamos al restu de partíos a que se sumen a esti consensu mayoritariu pol asturianu. Invitamos al PP y a Ciudadanos a abrir un periodu de reflexión sobre la situación llegal de la llingua asturiana pa finar d’una vegada con una situación de desequilibriu de drechos entre ciudadanos y ciudadanes. Nun momentu nel que sociedá asturiana espresó de manera clara y contundente que quier futuru y protección pal asturianu, los partíos políticos nun pueden contribuir a llevantar muros d’intolerancia contra l’asturianu y a ser coherentes colo que les mesmes fuercies polítiques defienden en territorios cercanos”.
El presidente d’Iniciativa pol Asturianu recordó que “la oficialidá ye transcendental y una prioridá p’Asturies porque, amás de fortalecer y reforzar la normalización del idioma y reconocer los drechos de los falantes, agora mesmo tamos perdiendo fondos de los Presupuestos Xenerales del Estáu y ayudes de la Xunión Europea por esta falta de reconocimientu”.
