Iniciativa pol Asturianu aplaude la decisión del equipu de gobiernu d’Avilés de recuperar la conceyalía de Normalización Llingüística. La entidá ve positivu’l cambéu de postura y confía en qu’esti apueste suponga avances firmes nesta materia. L’asociación va solicitar a la mayor brevedá posible un conceyu cola responsable nueva d’esta área.
La organización de reivindicación llingüística recuerda que «independientemente de los partíos políticos que conformen el gobiernu municipal tien qu’haber un compromisu nidiu col asturianu que nun puede depender de nomes ni de persones. Animamos al equipu de gobiernu avilesín a medrar la presencia de la llingua asturiana en toles estayes municipales». D’igual manera, la entidá reivindica avances potentes en materia llingüística nun gobiernu que cuenta con una gran mayoría nel plenu de partíos qu’apuesten por implementar estes polítiques.
La conceyalía de Normalización Llingüística desapaeció del organigrama municipal tres la reorganización del equipu de gobiernu local anunciada hai dos selmanes. Naquel momentu la entidá reclamó públicamente a l’alcaldesa, Mariví Monteserín, reconsiderar la perda del rangu de conceyalía pa les polítiques de normalización del idioma. El presidente d’Iniciativa pol Asturianu, Iván Llera, señala que «esta ye una ferramienta perimportante pa siguir trabayando nuna presencia normal del asturianu en tola acción de gobiernu».
Iniciativa pol Asturianu va solicitar en díes vinientes un alcuentru cola conceyala pa poner sobre la mesa les propuestes de la entidá nesta materia. Sobre la mesa, la creación d’un muérganu consultivu relativu a la política llingüística nel Conceyu, l’aprobación d’un Plan de Normalización que fixe los oxetivos pa esta llexislatura y la regulación del drechu de la ciudadanía a dirixise n’asturianu al Conceyu. Tamién otres cuestiones como l’usu de la toponimia oficial y la rotulación d’espacios.
