Iniciativa pol Asturianu quier denunciar el casu que la Cooperativa El Nocéu-y facía llegar estos díes alredor d’una situación de discriminación llingüística que sufrieron énte la Tesorería Xeneral de la Seguridá Social, dependiente del Ministeriu de Trabayu y Seguridá Social, na que nun fueron almitíos los sos estatutos por tar redactaos n’asturianu, obligándolos a presentalos en castellán. Esta discriminación, frutu de la falta d’oficialidá pero tamién de la falta de sensibilidá de les aliministraciones públiques, ye inalmisible pa Iniciativa pol Asturianu.
Los socios de la cooperativa espliquen como “al intentar danos d’alta como trabayadores de la cooperativa, atopámonos cola imposibilidá de facer cualesquier xestión cola almistración estatal na nuestra llingua propia, empleando na so argumentación l’artículu 4 del capítulu II de la Llei d’Usu y Promoción del Asturianu nel que se llimita l’usu d’esti idioma a l’alministración autonómica”.
Nuna segunda instancia, na qu’una trabayadora d’esti organismu tenía de recurrir a los estatutos pa resolver una cuestión llaboral, “ésta nun quixo nin garralos pol fechu de tar escritos n’asturianu” espliquen dende El Nocéu.
Dende Iniciativa pol Asturianu sumámonos a la so petición pa que se revierta esta situación de discriminación continua. Como bien espliquen dende El Nocéu “Les persones qu’optamos por usar el nuestru idioma a la hora d’espresanos, de forma oral o escrita, nun podemos siguir marxinaes d’esta forma tan inxusta. Queremos dexar de ser persones de segunda a los güeyos de los poderes que siguen reprimiéndonos una y otra vez, cuando lo únicu que pidimos ye que se respeten los nuestros derechos básicos, la llibertá de poder espresanos na nuestra llingua”.
Dende Iniciativa pol Asturianu solidarizámosnos con esta cooperativa y coindicimos con ellos en que “ l’únicu marcu que puede garantizar los derechos llingüísticos básicos de les persones asturfalantes ye la oficialidá del asturianu”.
