XIXÓN 10/06/2019. Iniciativa pol Asturianu afala a usar l’asturianu (o’l gallego-asturianu na so zona) nel so xuramentu o promesa a los 928 conceyales y 78 alcaldes y alcaldeses que van tomar posesión de los sos cargos esti sábadu 15. Esti xestu simbólicu ye una bona forma d’entamar los mandatos de les corporaciones teniendo presente la llingua propia d’Asturies.

En numberoses ocasiones conceyales y diputaos asturianos, ya inclusive una eurodiputada, xuraron o prometieron el so cargu n’asturianu. Esta llexilatura, agora que’l compromisu cola oficialidá del asturianu tien más sofitu políticu que nunca nes instituciones como acreiten los resultaos del 26 de mayu, ye un bon momentu pa poner en práctica una de les ferramientes más útiles y más cencielles de da-y promoción al idioma, usala de forma normal ente los y les representantes públicos.

Esti xestu tien d’acompañase dende’l primer día con midíes ya iniciatives empobinaes a meyorar la situación del asturianu nel ámbitu de los conceyos, onde ye necesario usar l’asturianu, recuperar y oficializar la toponimia tradicional, aprobar ordenances de normalización o poneles en marcha ellí onde yá esisten, da-yos un meyor usu y estabilidá a los servicios de normalización llingüística y facer polítiques que-y dean presencia al asturianu en tolos ámbitos de la xestión de los conceyos. Pa cumplir estos oxetivos, dende Iniciativa pol Asturianu tamos preparando un documentu con una montonera de propuestes mui concretes pa desarrollar dentro d’estos cuatro años y que permitiríen dir avanzando na normalización social del asturianu.

Dende Iniciativa pol Asturianu ufrimos el nuesu asesoramientu llingüísticu y animamos a tolos conceyales y alcaldes interesaos en dar pasos a favor de la normalización a ponese en contautu con nós nel nuesu corréu info@iniciativapolasturianu.org.

Testos de xuramentu y promesa pa conceyales:

  1. Xuramentu. «Xuro, pola mio conciencia y honor, cumplir con fidelidá les obligaciones del cargu de conceyal con llealtá al Rei, y curiar y facer curiar la Constitución como Norma Fundamental del Estáu».
  2. Promesa. «Prometo, pola mio conciencia y honor, cumplir con fidelidá les obligaciones del cargu de conceyal con llealtá al Rei, y curiar y facer curiar la Constitución como Norma Fundamental del Estáu».

 Testos de xuramentu o promesa p’alcaldes y alcaldeses:

«Xuro o prometo cumplir con fidelidá les obligaciones del cargu d’Alcalde/esa Presidente/a del Escelentísimu  Conceyu de _______ con llealtá al Rei, y curiar y facer curiar la Constitución como Norma Fundamental del Estáu».