L’Asociación de Docentes d’Asturianu y d’Eonaviego (ADAE) entamó esta tarde un enzarru nel Colexu Públicu de Cabueñes de Xixón pa reclamar al Ministeriu d’Educación l’aprobación de la Especialidá Docente d’Asturianu. Dellos miembros d’Iniciativa pol Asturianu asistieron a la movilización pa mostrar el sofitu de la organización a esta protesta.
La presidenta d’Iniciativa pol Asturianu, Arantza Margolles, aprovechó la movilización pa recodar que “la especialidá docente ye una ferramienta imprescindible pa garantizar la calidá de la enseñanza de les llingües propies d’Asturies y que nun puede esperar más. Esta movilización cuenta col sofitu del profesoráu, de les families, del movimientu de reivindicación llingüística y de los sindicatos.”
Margolles consideró que “los docentes de l’asignatura de Llingua Asturiana son un exemplu pa siguir trabayando na reivindicación del nuesu patrimoniu llingüísticu. L’ausencia d’especialidá provoca que la materia nun cuente con un marcu específicu que garantice estabilidá, reconocencia profesional y planificación a llargu plazu. Amás, provoca rotaciones constantes, amás de dificultar la consolidación de plantiyes”.
Iniciativa pol Asturianu recuerda que la enseñanza del asturianu y del eonaviegu vien siendo una demanda social amplia y sostenida nel tiempu, y que’l trabayu del profesoráu resultó fundamental pa consolidar la presencia d’estes materies nel sistema educativu asturianu.
Por ello, la organización considera xusto y necesario que s’atienda la reivindicación d’ADAE y se garantice una especialidá docente propia que dea estabilidá al colectivu docente y seguranza xurídica al futuru de la enseñanza d’estes llingües.
Amás, Iniciativa pol Asturianu volvió a faer un llamamientu al Gobiernu d’Asturies pa que s’implique na busca d’una solución que dea rempuesta a les demandes del profesoráu y que refuerce’l compromisu coles llingües d’Asturies. Margolles recordó que “va quince díes, la Xunta Xeneral refrendó, una vegada más, el sofitu a la creación de la Especialidá Docente. Pero´l compromisu nun puede quedar ehí. Ye’l momentu d’encabezar esta reclamación a la Ministra d’Educación, Milagros Tolón”.
Arantza Margolles quixo tamién llanzar un mensaxe de fuercia a tolos participantes na movilización apuntando que “güei toles falantes, tol movimientu de reivindicación, los y les estudiantes d’asturianu tamos con ADAE y col profesoráu d’asturianu. Tresmitimos fuercia, puxu y ánimu pa siguir nesti camín de movilizaciones pa llograr la xusta aprobación de la Especialidá Docente”.
Al empar, Iniciativa pol Asturianu quier treslladar el so reconocimientu al esfuerciu y compromisu a les persones que participen nel enzarru y reafita’l so compromisu de siguir trabayando pola dignificación y normalización social del asturianu y del eonaeviego nel ámbitu educativu.
