Los representantes d’Iniciativa pol Asturianu recalcaron la importancia de que la formación especifique la oficialidá del asturianu nel so programa electoral como un compromisu irrenunciable colos drechos ciudadanos
Esti miércoles 4 de marzu representantes del Círculu de Derechos Llingüísticos de Podemos tuvieron nel llar d’Iniciativa pol Asturianu en Xixón nun conceyu convocáu polos miembros d’esti círculu de Podemos Asturies pa conocer les nueses propuestes al respective de la política llingüística, de cara a proponer delles d’eses propuestes a la so formación pa incluyiles nel programa electoral de les vinientes elecciones autonómiques.
Iniciativa pol Asturianu recordó la necesidá de que la formación recueya nel so programa’l so compromisu de solucionar el conflictu llingüísticu esistente n’Asturies, pente medies de la oficialidá de la llingua asturiana, única solución posible nel marcu llegal actual.
Sicasí, esti compromisu nun ye suficiente, polo qu’Iniciativa pol Asturianu propunxo tamién otres midíes empobinaes que pueden ponese en marcha yá nel marcu actual, tales como acoyese a un Compromisu de Billingüismu 100% que yá venimos proponiendo a otres formaciones ya instituciones. Esti compromisu supondría que tolos materiales asoleyaos poles intituciones comprometíes col asturianu fueren editaes en billingüe (asturianu/castellán) dientro del mesmu formatu, dando una importante visibilidá al idioma a costu cero.
A lo llargo del conceyu falóse tamién de la necesidá de tratar la cuestión llingüística n’Asturies cola emerxencia que requier una llingua en grave peligru de desapaición, talo y como reconoz la UNESCO.
Falóse tamién de la importancia de meyorar la presencia del asturianu nos medios de comunicación, n’especial los públicos, asina como la necesaria formación del funcionariáu y la presencia digna del asturianu nel sistema educativu, que pa Iniciativa pol Asturianu pasa por convertir a l’asignatura de Llingua Asturiana nuna asignatura normal, dientro del currículu, como les demás y en tolos niveles, garantizando la llibertá de los ciudadanos al salir del sistema educativu formaos pa poder usar l’asturianu con normalidá. Amás, por supuestu, de la puesta en marcha d’esperiencies pilotu que lleven a la esistencia de modelos educativos col asturianu como llingua vehicular.
Iniciativa pol Asturianu volveré a espresar estes idees nel conceyu abiertu de Podemos Asturies al que mos convidaron los represenantes del Círculu de Derechos Llingüísticos y que va celebrase esti sábadu en Xixón.
