Iniciativa pol Asturianu aconceyó col movimientu de reivindicación llinguística de Lleóny Zamora

LLEÓN/UVIÉU 02/04/2012. Representantes d'Iniciativa pol Asturianu viaxaron a territoriu lleonés y tuvieron un primer contautu coles organizaciones qu'integren el movimientu de reivindicación llingüística lleónés el pasáu 31 de marzu na sede de La Caleya, n'Estorga (Lleón).

Esta xunta encuádrase dientro de la rolda d'alcuentros colos coleutivos en defensa del idioma. Nesta ocasión Iniciativa pol Asturianu quixo conocer de primera mano'l llabor y l'actividá qu'éstos vienen desendolcando en Lleón y Zamora, asina como abrir canales de comunicación y cooperación futures.

Delegaos de Furmientu, Faceira y La Caleya intercambiaron impresiones y propuestes cola nuesa organización pa facer una defensa unánime de la llingua qu'une a bona parte de Zamora y Lleón con Asturies. El nuesu oxetivu ye plantegar aquellos proyeutos que seyan d'interés pal idioma en dambos territorios y llevar alantre aquellos que puedan ser válidos a tol dominiu llingüísticu de manera conxunta. Asinamesmo Iniciativa pol Asturianu treslladó la voluntá firme de la organización por afitar una conexón sólida con tolos territorios onde l'asturianu ye llingua propia, espeyada na creación de la vocalía de dominiu llingüísticu, qu’organizó esti aconceyamientu.

D'otra miente, púnxose atención ente otres cuestiones na situación esmolecedora que vive l'idioma al sur del cordal; na perda progresiva de falantes, na ausencia total de lleis que garanticen los sos drechos, na falta de prestixu social y na falta d'actuaciones de puesta en valir del patrimoniu llingüísticu y inmaterial como recursu que ye y como fonte de desenrollu social y económicu."