Iniciativa pol Asturianu entama esti llunes, 3 de xineru, la votación de la ‘Meyor noticia pal asturianu en 2021‘. D’esta manera, la organización pretende escoyer, pente medies d’una votación popular n’internet, la meyor noticia pal idioma nel pasáu añu 2021.
El presidente de la organización, Iván Llera, aseguró que “faciendo un repás a les bones noticies pal idioma nel añu 2021, dímonos cuenta de que l’añu pasáu foi ún de los que más noticies positives tuvo pal asturianu, lo cual tamién ye una bona anuncia”. Amás, señaló que “con esta campaña pretendemos facer llegar a los asturianos y a les asturianes delles bones noticies pal nuesu idioma. Queremos que la sociedá seya partícipe tamién d’estes bones noticies pa la llingua asturiana”.
Los y les participantes pueden escoyer ente un total de 15 bones noticies pal asturianu de diferente tipu d’un total de 39. La votación entama esti llunes 3 de xineru y va acabar el vienres 14 d’esti mes. Amás, los y les participantes van participar nun sortéu de llibros n’asturianu.
