La selmana qu’entra, los díes 2 y 3 de mayu, Inaciu Galán, el periodista y activista, miembru d’Iniciativa pol Asturianu que sedrá recibíu como miembru de l’Academia de la Llingua Asturiana esti 6 de mayu, va participar como espertu convidáu nel Foru Rexonal Europa-Asia Central de Minoríes de la ONU qu’organiza l’Altu Comisionáu de Drechos Humanos en Viena (Austria) cola idea de revisar, repensar y reformar la Declaración de la ONU sobre los drechos de les minoríes, que fai agora 30 años.

Na so intervención, que tendrá llugar el llunes de magar les dos de la tarde, Galán va esplicar énte los miembros de la ONU y espertos internacionales en drechos de minoríes, la situación del asturianu, centrándose na falta de reconocencia de drechos pa los sos usuarios que supón la falta d’oficialidá nos territorios onde se fala, tanto n’Asturies, como en Llión y nel restu de territorios onde ye llingua propia.

Na mesa na que va participar Inaciu Galán van tar tamién los espertos Manfred Nowak, secretariu xeneral del Global Campus of Human Rights, Sia Spiliopoulou Åkermark, director y abogáu internacional nel The Åland Islands Peace Institute, Loránt Vincze, miembru del Parllamentu Européu y presidente de la Federal Union of European Nationalities y Meena Varma, directora executiva del International Dalit Solidarity Network and Chair, Council Members, Minority Rights Group International.

Dientro de los actos previstos nesti foru, el martes Galán participará nuna recepción col Ministru d’Asuntos Europeos ya Internacionales d’Austria y ex canciller federal austriacu, Alexander Schallenberg. El pieslle del foru va ponelu Fernand de Varennes, Relator Especial de la ONU sobre cuestiones de les minoríes.