Atendiendo a la llimitación de dos mandatos qu’establecieron los estatutos d’Iniciativa pol Asturianu dende la so fundación en 2011, el periodista y profesor Inaciu Galán, va rematar el so periodu como presidente de la ONG
XIXÓN 18/06/2019. Atendiendo a la llimitación de dos mandatos qu’establecieron los estatutos d’Iniciativa pol Asturianu dende la so fundación en 2011, el periodista y profesor Inaciu Galán, va rematar el so periodu como Presidente de la ONG Iniciativa pol Asturianu esti sábadu y dientro del marcu del III Congresu de la organización, onde se va anovar la Xunta Directiva, pa los vinientes trés años.
Inaciu Galán foi xunto al profesor y traductor Víctor Suárez impulsor d’esta entidá, tres delles reflexones feches públiques nel branu de 2011 sobre la situación del movimientu de reivindicación llingüística n’Asturies. Suárez respondió con otru artículu y dende entós numberoses persones punxéronse en contacto con dambos col envís d’animalos a poner en marcha una nueva organización.
Nel mes d’ochobre d’esi mesmu añu tuvieron llugar los primeros alcuentros nos qu’un grupu más numberosu de persones punxeron les bases de lo que diba ser Iniciativa pol Asturianu, que se presentaba en sociedá nel mes de payares de 2011.
Dende entós, Inaciu Galán dirixó dos xuntes directives, tres la renovación en 2015. Agora, cumplíos los plazos máximos marcaos polos estatutos d’Iniciativa pol Asturianu, remata’l so mandatu, dando pasu a un nuevu presidente o presidenta. Esti nuevu cabezaleru de la organización va escoyese nel III Congresu d’Iniciativa pol Asturianu, esti sábadu 22 de xunu a les 16:30 hores, nel Vieyu Institutu Xovellanos, que se celebra baxo’l títulu “Contruyendo’l consensu pola oficialidá”.
Inaciu Galán declaró tar “mui contentu con esti periodu y el trabayu fechu”, que pal tovía presidente, “supunxo camudar les formes de trabayar, enanchar les bases de sofitu a la oficialidá y facer un trabayu tresversal”. Amás quixo agradecer “a toles persones que collaboraron nestos años pa consiguir qu’Iniciativa pol Asturianu fuere una ferramienta útil pa la sociedá y pal futuru del asturianu”. “Despídome con oxetivos pendientes, pero con munchos otros algamaos, y sobre too cola allegría de ver una organización afitada y sobre too por ver que na sociedá asturiana hai güei un consensu na oficialidá”.
