“Esta mañana tamos n’Aragón recordando qu’equí tamién se fala una llingua, l’aragonés, que como l’asturianu alcuéntrase nuna situación de desigualdá al nun contar estos idiomes col estatus d’oficialidá”
“Una de les meyores maneres de xustificar los medios de comunicación públicos ye afitar y aumentar la presencia de conteníos na llingua propia de los territorios”
ZARAGOZA, 13/04/2019. Inaciu Galán, presidente d’Iniciativa pol Asturianu, participó güei nes “XXVI Chornadas d’as luengas d’Aragón”, entamaes pola organización Nogará, echando una conferencia baxo’l título de “L’asturianu: creando cultura (y normalizando) al traviés de los medios”. Galán comentó na so intervención que “los medios de comunicación tienen un papel esencial na normalización de les llingües porque son una forma de mantener vivu l’idioma y que la sociedá vea como dalgo normal el poder sentir un informativu o poder lleer una crónica deportiva na to propia llingua. Tamién ye una manera de da-y prestixu al idioma”.
Dientro d’estes xornaes tamién se faló de la oficialidá del asturianu y del aragonés. Galán recalcó que “esta mañana tamos n’Aragón recordando qu’equí tamién se fala una llingua, l’aragonés, que como l’asturianu alcuéntrase nuna situación de desigualdá al nun contar estos idiomes col estatus d’oficialidá. La falta d’oficialidá del aragonés y del asturianu ye anticonstitucional y ye una situación que tien que correxise. Vamos trabayar xuntos nel camín de la normalidá y de la oficialidá d’estes dos llingües”.
El presidente d’Iniciativa pol Asturianu dixo tamién que “una de les meyores maneres de xustificar los medios de comunicación públicos ye afitar y aumentar la presencia de conteníos na llingua propia de los territorios. Esti argumentu a favor de la presencia de llingües como l’aragonés o l’asturianu nos medios públicos ye importante porque estes llingües marquen la diferencia de conteníos nuna televisión pública”.
Galán recordó que “dende Iniciativa pol Asturianu venimos trabayando dende va tiempo en pedir a los partíos una mayor presencia del asturianu na RTPA, amás ficimos propuestes como la de crear una dirección de conteníos dientro del ente porque entendemos que la llingua asturiana tien que tener una mayor presencia na radio y na televisión pública d’Asturies”.
Inaciu Galán acabó anunciando que “pa Iniciativa pol Asturianu los medios son una ferramienta pa normalizar la llingua asturiana y por ello dientro del seminariu que tamos preparando pal 17 y 18 de mayu, vamos contar con un alderique sobre’l papel de los medios de comunicación na normalización del asturianu”.
