Esti vienres 12 d’avientu, el periodista, investigador, miembru de l’Academia de la Llingua Asturiana y fundador d’Iniciativa pol Asturianu, Inaciu Galán, dio una conferencia en Mallorca sobre la historia de la llingua asturiana, na que se centró especialmente nos casos de represión llingüística que sufrieron los falantes d’esta llingua dende va sieglos.
Sol títulu, «La llengua asturiana, una altra història de repressió llingüística», l’académicu introdució la historia de la llingua pa depués conocer testimonios escritos como’l de la prohibición gubernamental de falar per teléfonu n’asturianu, del añu 1896, y audiovisuales, con casos de represión llingüística mientres el tiempu del franquismu y en tiempu democráticu.
Mientres la so conferencia proyectó fragmentos de dalgunos de los documentales que dirixó nos últimos años sobre esta cuestión, ente los que destaquen, «No se dice ‘ye’, se dice ‘es’. Represión llingüística na Asturies franquista» o «La vida ensin oficialidá», producíu por Iniciativa pol Asturianu. Mientres la conferencia presentó tamién videos del proyectu del Archivu de la Represión Llingüística del asturianu [ARLAS.net], que dirixe y nel que collabora Iniciativa pol Asturianu.
La conferencia, que l’investigador asturianu ufiertó en catalán, foi entamada pola Obra Cultural Balear, la institución cultural más prestixosa nes Illes Balears. Fundada en 1962 trabaya pal espardimientu de la cultura, la llingua y la identidá de les Illes Balears. La conferencia tuvo llugar nel Espai Climent Garau de Bunyola, onde l’escritor asturianu foi presentáu pol profesor Jaume Corbera i Pou, presidente de la Obra Cultural Balear na llocalidá.
