Va unos díes dientro del POEX, festival que Xixón dedica a la poesía, dellos y delles componentes de la revista Formientu soplaben les venti veles de la publicación d’esta revista lliteraria moza nacida en Xixón nel añu 2006. Dende l’entamu, Formienti llogra asoleyar al menos un númberu añal.
Dende los sos entamos, Formientu apostó por daqué tan cenciello como revolucionario: dar voz a autores mozos y moces que escriben n’asturianu. Nun ye una decisión inocente. Apostar pola mocedá implica asumir riesgu, incertidume y, delles vegaes, nueves idees y formes creatives. Pero tamién significa abrir puertes a nueves sensibilidaes, anovar la lliterarura y evitar que la creación n’asturianu se convierta nun espaciu zarráu o esclusivu.
Nesti sentíu, la revista furrula como un escaparate pa los y les escritores. Nes sos páxines nun solo se publiquen testos, poemes o rellatos; tamién s’anova la lliteratura y se crea llibremente. Y eso tien un valor incalculable. Ye cierto que’l futuru del asturianu pasa pel so usu en tolos ámbitos: l’empresarial, insitucional, medios de comunicación, presencia digna na escuela, na música… Pero tamién ye necesario llograr espacios llibres pa la espresión, pa la creación y y pa la innovación. Necesita, en definitiva, un espaciu onde crear y mostrar esa nueva lliteratura como ye’l casu de Formientu.
Al rodiu de la publicación llogró artículase una rede d’escritores/militantes y tamién d’un públicu de llectores que comparten una esmolición común pol futuru de les nueses lllingües. Como presidenta d’Iniciativa pol Asturianu y escritora nun puedo más que treslladar la mio felicitación a tantos y tantes semadores de pallabres, de versos y de rellatos que llograron arriquicer les nueses lletres, la nuesa lliteratura, asina como a los sos directores. Esti gran trabayu colectivu y lliterariu de Formientu llogra acreitar que nun hai llímites pal asturianu nin pa la mocedá: nun hai llingua pequeña nin nada ye imposible pal nuesu idioma.
Tien munchu méritu llograr caltener a lo llargo del tiempu una revista que cuente con esta implicación. Ye una allegría pa un idioma como l’asturianu llograr axuntar a tantes persones moces que son capaces de poner el so amor, la so creación y el so maxín al serviciu de la llingua asturiana.
Esti 20 aniversariu de Formientu tien una trascendencia más grande de lo que pensamos pol gran esfuerciu y trabayu que suponxo arrancar cola revista pero tamién mantenela viva coles nueves fornaes nueves d’escritores.
Si nel añu 1639, Antón de Marirreguera escribía la primer obra documentada de la literatura n’asturianu, güei -387 años más tarde- cuntamos con mozos y moces con 17, 18 y 19 años que son capaces de caltener esa herencia creativa y lliteraria na so llingua propia nuna coyuntura cultural, social y llingüística tan complicada. A pesar de la falta falta de la oficialidá y en dalgunes ocasiones de los pocos sofitos institucionales, la llitetura asturiana ta más viva que nunca y güei esos xóvenes conviértense n’herederos de Marirreguera.
Celebrar estos venti años de Formientu ye celebrar la persistencia d’una idea: qu’un idioma -a priori pequeñu- tamién pue xenerar lliteratura grande, bayura y preciosa.
Gracies a los sos directores (Inaciu, Claudia y Diego), gracies a la nómina d’escritores que participaron nos sos númberu y puxu a tola mocedá pa siguir semando lliteratura n’asturianu.
Arantza Margolles, presidenta d’Iniciativa pol Asturianu
