El premiu de poesía y rellatos curtios Aurelio González Ovies va permitir la presentación d’obres n’asturianu tres el pidimientu d’Iniciativa pol Asturianu. El Conceyu de Gozón presentó va unes selmanes la convocatoria del primer premiu lliteriariu que lleva’l nome del autor bañugueru. Sicasí les bases únicamente contemplen la presentación de testos escritos en castellán.
Iniciativa pol Asturianu cuenta con una xera continuada pa tratar que tolos premios que se convoquen n’Asturies permitan al menos presentar obres n’asturianu. Idealmente con categoría propia diferenciada, pero sinón al menos eso, que permitan participar. Depués de comprobar les bases de la nueva convocatoria lliteraria, la organización comprobó que nun contaba nin con una categoría específica na llingua propia pero tampoco aporta la posibilidá de presentar llibremente creaciones n’asturianu. Ante esta tesitura, la organización de reivindicación llingüística contactó cola conceyalía de Cultura de Gozón pa reclamar l’ampliación de la convocatoria y permitir el concursu de testos n’asturianu.
L’asociación considera qu’esto permitiría una mayor participación de los autores asturianos ensin tener qu’arrenunciar a escribir nel so idioma maternu, arriqueciendo la creación cultural n’asturianu y visibilizando la propia llingua. Destaca amás que sería lo más coherente teniendo en cuenta la tradición lliteraria del titular del premiu.
El conceyal de Cultura, Israel González, mostró la to total disposición a la reclamación plantegada pola asociación de reivindicación llingüística y comprometióse a que na siguiente convocatoria sería posible presentar obres n’asturianu. La organización de reivindicación llingüística agradez la predisposición al diálogu y l’aceptación d’esta demanda.
