El plenu del Conceyu d'Uviéu recibió güei la propuesta que yá se llevare a la Comisión d'Economía ya Infraestructures. La moción, presentada por Izquierda Xunida, cuntó colos votos a favor de PP y PSOE y l’abstención de Foro, amás del votu a en contra del conceyal non adscritu  Pedro Manuel Fernández Ruiz, que fizo un discursu contrariu a la normalización del asturianu llegando a dicir qu'esta iniciativa "no hará más que complicar la vida a los ciudadanos", frente a un consensu xeneral a favor de la llingua, que supunxo 21 votos a favor, 4 abstenciones y namás 1 votu en contra.

Iniciativa pol Asturianu presentó va un mes una quexa al Conceyu d’Uviéu pola falta d’usu del asturianu nel sistema de tresporte  públicu de viaxeros d’Uviéu (TUA) La quexa púnxose en conocimientu de les fuercies polítiques presentes nel plenu, ya Izquierda Xunida convirtió esta quexa nuna moción. Agora'l plenu confirma la decisión de la comisión.

Dende Iniciativa pol Asturianu celebramos esta decisión y felicitamos a los grupos políticos que votaron a favor, y n’especial a IX por presentar la propuesta, por apostar pola normalización del idioma nun ámbitu tan importante pa la visibilización de la llingua asturiana como son los autobuses urbanos, que percuerren la ciudá y el conceyu d’Uviéu tolos díes, pasando per ellos cientos de miles d’usuarios cada añu. Llamentamos el votu d'abstención de Foro d'Uviéu que pensamos que contradiz el programa políticu de la formación, que pide'l desenrrollu de la Llei d'Usu del Asturianu de 1998. 

El pasu ye positivu, pero somos conscientes de que pue quedar en papel moyao, polo que fadremos un siguimientu continuáu de los pasos que se dan, esperando que’l trabayu se lleve alantre nun tiempu razonable. Esta ye namás una de les munches cuestiones pendientes alredor del usu del asturianu per parte del Conceyu d’Uviéu y animamos a l’alministración dirixida pol alcalde Agustín Iglesias Caunedo a dar más pasos nel camín hacia un usu normal del asturianu per parte de l’alministración llocal de la capital asturiana.

 

Videu de la discusión y votación de la moción nel plenu d'Uviéu

Artículos venceyaosMás del autor