Iniciativa pol Asturianu al traviés del vocal, Inaciu Galán, presentó’l programa íntegru del so IV Seminariu ‘Oficialidá: el camín constitucional de futuru pal asturianu’. Nesta edición, l’alcuentru lleva’l sotítulu de ‘Entrín y non. Normalizar enantes de la oficialidá’. La organización, qu’entama les xornaes los díes 15 y 16 de marzu nel Edificiu Históricu de la Universidá d’Uviéu, va cuntar con conferencies, meses de diálogu y la estrena d’un nuevu documental qu’afonda nes consecuencia d’aplicar les nueves tecnoloxíes y la intelixencia artificial a la llingua asturiana.
El programa d’actos va entamar el vienres 15 de marzu cola inauguración institucional del Seminariu coles intervenciones del rector de la Universidá d’Uviéu, Ingacio Villaverde, y coles intervenciones d’Iván Llera y Claudia Elena Menéndez, presidente y vicepresidenta, respectivamente, d’Iniciativa pol Asturianu.
Dempués va ser el turnu de conocer varies esperiencies de normalización en marcos llegales desfavorables. En concretu, espertos del euskera en Navarra, del llionés y del occitanu en Cataluña van presentar l’aplicación llexislativa en materia llingüistica y les polítiques de normalización llingüística qu’angüaño s’apliquen nos sos territorios.
La xornada del sábadu 16 de marzu va entamar a les 10:30 hores con una mesa redonda baxo’l título ‘Del bable nes escueles al asturianu na intelixencia artificial. 50 años de reivindicación mirando al futuru’ que pretende aldericar y analizar como foi camudando la movilización de defensa pal idioma. Nesti apartáu van participar Lluismi Orviz, director del CRA Les Mariñes, Arantza Margolles, hestoriadora, el filólogu Ramón d’Andrés, Aymara González Montoto, traductora ya Iris Díaz Trancho, maestra y miembru de Reciella.
El programa va siguir cola presentación del documental ‘Normalizar con intelixencia.L’asturianu énte los retos tecnolóxicos y comunicativos del futuru’ que quier afondar nos retos, posibilidaes y dificultaes que tiene una llingua como l’asturianu nes nueves perspectives dixitales.
Na metá del segundu día, l’alcuentru va cuntar cola presencia de la influencer y presentadora aragonesa, Silvia Cebolla, que va esponer la so visión sobre les esperiencies positives dende los medios y les redes sociales na normalización d’una llingua como l’aragonés que, como l’asturianu, entá nun ye oficial.
Pa finar la mañana, Carlos Rubiera, miembru de númberu de l’Academia de la Llingua Asturiana y presidente de la Fundación Alma Astur, va presentar la Xira pola Oficialidá; una campaña que quier movilizar a la ciudadanía asturiana sobre la protección del asturianu y la defensa de la oficialidá.
La recta final del IV Seminariu va comenzar con una ponencia del abogáu Nicolás Bartolomé sobre los retos y les propuestes d’una reforma de la Llei d’Usu y Promoción.
A les 17:30 hores, Inaciu Galán y Claudia Elena Menéndez, como comité científicu; ya Iván Llera, como presidente d‘Iniciativa pol Asturianu van presentar el proyectu Archivu de la Represión Llingüística del Asturianu (ARLAS).
De magar les 18:00 hores, va celebráse la cabera mesa de diálogu del alcuentru, baxo’l títulu ‘Les llingües nel Congresu y otros retos de la normalización nel ámbitu estatal’ na que van participar representantes de diferentes asociaciones de reivindicación llingüística d’España. Xunto con esta mesa, va lleese la Declaración d’Uviéu que quier convertise nun manifiestu en defensa de la realidá plurillingüe d’España y que va aportar un decálogu de propuestes en defensa de los idiomes.
El IV Seminariu va rematar cola actuación musical del dúu Mestura que van interpretar diversos cantares nes llingües propies d’Asturies.
Les inscripciones tan abiertes nun formulariu que s’atopa na páxina web de la organización.
Iniciativa pol Asturianu agradez la collaboración de toles persones asociaes que tan echando un gabitu pa sacar alantre esti eventu y la Unviersidá d’Uviéu pola cesión de los espacios.
Programa completu del IV Seminariu
