L’asociación presentó una quexa ofical y Alcaldía comprometióse a correxir los erros va más d’un mes
L’Alcaldía del Conceyu de Xixón, púnxose en contactu al traviés de carta (de 25/10/2012) pa responder a la reclamación presentada por Iniciativa pol Asturianu énte’l rexistru del Conceyu dempués de que los autobuses de Xixón, de la compañía pública EMTUSA, dexaren d’usar en paraes y nos indicativos de los vehículos la toponimia oficial dende l’añu 2006, con casos como “Les Mestes”, que volvió al derogáu topónimu “Las Mestas” o “El Cerilleru”, que pasó a ser “Cerillero”.
Na carta comunícase a Iniciativa pol Asturianu que “va procedese a revisar les posibles variaciones que puedan detectase” yá que según l’alministración xixonesa “la política de toponimia d’EMTUSA nun sufrió nengún cambiu”, polo que paez que’l cambiu nun foi autorizáu dende Alcaldía, sinón que respuende al criteriu de la dirección d’EMTUSA. El Conceyu agradeció a Iniciativa pol Asturianu la reclamación “qu’ayuda a ufrir un meyor serviciu a los ciudadanos”.
Iniciativa pol Asturianu esperó un tiempu prudencial pa comprobar que se facíen los cambios, pero dempués de cuasi dos meses, los autobuses de la ciudá siguen ensin cumplir la llegalidá toponímica. Iniciativa pol Asturianu aguarda que’l cambiu se produza d’inmediato nos autobuses y paraes d’EMTUSA, “pues l’usu de la toponimia oficial nun ye opcional pa les alministraciones públiques, que tienen la obligación de respetar el decretu topónimicu de Xixón, aprobáu col consensu de toles fuercies polítiques del Conceyu de Xixón en 2006”.
Amás, Iniciativa pol Asturianu recuerda al restu de departamentos del Conceyu de Xixón qu’entá nun cumplen col usu de la toponimia oficial, que siguirá denunciando los casos d’incumplimientu, al mesmu tiempu que la organización se pon a disposición de los sos responsables p’asesoralos nestes cuestiones.
Los conceyales de tolos departamentos han saber qu’usar l’asturianu na publicidá d’actividaes, cartelería d’instalaciones, anuncios en prensa, xunto al castellán si se quier, nun supón nengún gastu estra, yá que’l Conceyu de Xixón cunta con una Oficina de Normalización Llingüística na so estructura, polo que nun usalu ye namás frutu d’una intencionalidá y nunca pue echase la culpa a la falta de recursos. Ye por ello qu’Iniciativa pol Asturianu afala al Conceyu de Xixón a usar l’asturianu en toles actividaes, de forma tresversal, lo que supondría una importante promoción pa la llingua de los xixoneses y los asturianos, que tantes carencies sufre na so visibilización pública.
