Iniciativa pol Asturianu convoca la segunda edición del concursu lliterariu ‘Ensin muyeres nun hai idiomes’. La organización súmase d’esta manera a les reivindicaciones del 8 de marzu, Día Internacional de la Muyer, pa reflexonar sobre la importante figura de la muyer como pegoyu de quien deprendimos la nuesa llingua materna, fixándonos especialmente nesi idioma nel que viven, sienten y nos críen les muyeres que nos arrodien.
El concursu institúise con un total de tres premios (primeru, segundu y terceru) dotaos con un llote de llibros n’asturianu. El testu tien que tar venceyáu a la muyer y tar en rellación cola so importancia pal caltenimientu de la llingua asturiana, dende cualesquier perspectiva, seya reivindicativa o d’apegu.
Los trabayos han ser inéditos y orixinales, escritos en llingua asturiana o n’eonaviego, en prosa o versu y con un máximu de 280 pallabres. Los testos han d’enviase a info@iniciativapolasturianu.org en formatu PDF. La participación del concursu entama’l 3 de marzu a les 00:00 hores y fina’l 10 de marzu a les 12:00 hores. Les obres premiaes van dase a conocer el día 20 de marzu a les 12 hores, al traviés de la páxina web d’Iniciativa pol Asturianu (www.iniciativapolasturianu.org).
El xuráu tará compuestu por diferentes personalidaes, asina como por delles collaboradores de l’asociación de reivindicación llingüística. Iniciativa pol Asturianu anima a la sociedá asturiana a participar nesti concursu como homenaxe a toles muyeres que nos arrodien y a les que gracies a elles deprendimos asturianu.
