Iniciativa pol Asturianu entama esti vienres, 2 de xineru, la votación de la ‘Meyor noticia pal asturianu en 2025’. D’esta manera, la organización pretende escoyer, pente medies d’una votación popular n’internet, la meyor noticia pal idioma nel fináu añu 2023.
La presidenta d’Iniciativa pol Asturianu, Arantza Margolles, apuntó que “tamos mui contentos porque esta iniciativa estrenóse nel añu 2013 y cumple 13 años recoyendo bones noticies pal idioma.Ye una manera de faer repás a les tantes bones noticies pal asturianu, pa valorar el camín que tamos abriendo pa salvar la llingua asturiana y pa garrar fuercies pa trabayar esti añu qu’acaba d’empecipiar”.
Pa Iniciativa pol Asturianu esta votación ye importante porque “con esta campaña pretendemos facer llegar a la ciudadanía asturiana delles bones noticies pal nuesu idioma. Tamién val pa revisar tol llabor d’Iniciativa pol Asturianu y de les instituciones y comprobar cómo añu a añu la llingua asturiana tien una repercusión positiva nos medios de comunicación”.
Los y les participantes pueden escoyer ente un total de 10 bones noticies pal asturianu de diferente tipu d’un total de 22. El llistáu ufierta, amás de noticies d’Asturies, otres informaciones sobre avances nel comunidá llingüística como Llión y Miranda’l Douro. La votación entama esti vienres 2 de xineru y va acabar el sábado 10 d’esti mes. Amás, los y les participantes van participar nun sortéu d’un llote de llibros n’asturianu.
