Iniciativa pol Asturianu valoró güei mui positivamente’l respaldu espresáu pola mayoría parllamentaria de la Xunta Xeneral del Principáu d’Asturies a la reclamación pa crear la especialidá docente d’asturianu cola modificación de los Reales Decretos.
La organización de reivindicación llingüística recuerda que la falta d’una especialidá propia pa l’asignatura de Llingua Asturiana vien xenerando dende hai años una situación d’inestabilidá pal profesoráu que redunda na propia materia. Anguaño, munchos y munches docentes imparten l’asignatura ensin un marcu específicu que garantice estabilidá, reconocencia profesional y planificación a llargu plazu. Esta circunstancia provoca rotaciones constantes, amás de dificultar la consolidación de plantiyes.
Iniciativa pol Asturianu señala que la creación de la especialidá docente nun ye solo una cuestión llaboral, sinón una midida imprescindible pa normalizar y ameyorar la enseñanza de les llingües propies asegurarando la igualdá de drechos del alumnáu que escueye cursar la materia. El colectivu considera que l’ausencia d’Especialidá Docente ye una discriminación pa los y les docentes d’asturianu que dempués de tantos años sigue ensin iguase.
La mayoría parllamentaria de la Xunta Xeneral amosó’l so sofitu a esta reivindicación, lo que supón —según l’asociación— un pasu políticu fundamental pa dar solución definitiva a esta problemática.
Arantza Margolles apuntó que “va unos meses, la mayoría parllamentaria daba una mayoría de sofitu a la oficialidá. Güei esi sofitu mayoritariu ye pa llograr la Especialidá Docente d’Asturianu de Primaria, Secundaria y Universidaes. Reclamamos al presidente Barbón asumir personalmente la defensa d’esta cuestión y faer respetar esta mayoría parllamentaria énte’l Ministeriu d’Educación”.
Margolles añadió que “reclamamos que’l Gobiernu del Principáu d’Asturies, al traviés del so máximu representante, solicite ensin más demora un alcuentru cola Ministra d’Educación, Milagros Tolón, pa facer realidá la creación d’esta especialidá docente talo como reclama la propia Xunta Xeneral del Principáu d’Asturies, l’Asociación de Docentes d’Asturianu y d’Eonaviego, les organizaciones sindicales y nós mesmos”.
“La estabilidá del profesoráu ye clave pa garantizar una enseñanza de calidá. Nun podemos siguir con una situación de provisionalidá permanente que perxudica tanto al colectivu docente como al alumnáu” señaló la vocera de la entidá.
Iniciativa pol Asturianu confía en que’l consensu parlamentariu se tresforme en fechos concretos nos próximos meses y reafita’l so compromisu de siguir trabayando pa que la llingua asturiana tenga’l reconocimientu de la Especialidá Docente, como una ferramienta necesaria pa amayorar la materia y les condiciones llaborales de los sos trabayadores.
Pa finar, Iniciativa pol Asturianu reprobó al Partíu Popular d’Asturies pola so abstención na votación parllamentaria, que supón una involución respecto a la postura histórica del partíu nesta cuestión. La organización considera incomprensible la postura del grupu popular de desvinculase de la mayoría de los diputaos, respeuto a otres votaciones que se ficieron n’anteriores llexislatures. Margolles ironizó apuntando que “resulta impensable que los presidentes de Galicia o de la Comunidá Valenciana, tamién del PP, nun sofitaren una declaración d’esti tipu p’ameyorar la situación del profesoráu de les llingües d’estes comunidaes autónomes”.
