Esta mañana tuvo llugar nel Salón d’Actos del Hotel d’Asociaciones de Xixón (CMX) un conceyu de la presidenta d’Iniciativa pol Asturianu, Arantza Margolles, con Rafael Cofiño, diputáu nel Congresu del Grupu Parllamentariu Plurinacional Sumar, nel que s’analizaron delles cuestiones clave relatives a la presencia del asturianu nel sistema educativu y la Especialidá Docente, la normalización llingüística nel ámbitu estatal y la presencia de les llingües propies d’Asturies nos medios públicos.
Nel planu educativu, tratóse la necesidá d’avanzar na regulación de la Especialidá Docente de Primaria, Secundaria y Universidaes. El diputáu treslladó qu’angüaño se ta trabayando nuna Preposición Non de Llei (PNL) p’apostar por esti avance nel Congresu de los Diputaos. L’ausencia de la Especialidá Docente xenera una situación d’agraviu llaboral pal profesoráu asina como dificultaes pal enseñu de l’asignatura como lleva denunciando Iniciativa pol Asturianu dende la so fundación.
Otra de les cuestiones centrales foi la financiación de la Academia de la Llingua Asturiana (ALLA). Dende la organización de reivindicación llingüística destacóse la importancia d’incrementar la partida correspondiente nos Presupuestos Xenerales del Estáu, col envís de llograr una financiación equitativa en comparanza col restu d’academies de llingües del Estáu. Angüaño, l’ALLA ye la institución propia d’un idioma con menor aportación estatal.
El bloque más ampliu de la reunión centróse en Radiotelevisión Española (RTVE) y na evolución de les sos polítiques llingüístiques dende la llegada a la presidencia de José Pablo López n’avientu de 2024. Margolles recordó los avances na incorporación de les llingües cooficiales a la programación de televisión, radio y conteníos dixitales, asina como la creación del Área de llingües cooficiales y minoritaries y la entrada de RTVE nel Conseyu Estatal de Llingües Cooficiales.
La presidenta del colectivu de reivindicación llingüística treslladó delles entrugues concretes sobre les midíes previstes pa la promoción del asturianu en RTVE, la so posible inclusión en partíes presupuestaries de doblaxe y producción propia, y l’ampliación d’espacios informativos o culturales n’asturianu nel centru territorial d’Asturies que’l diputáu Rafael Cofiño se comprometió a treslladar.
Iniciativa pol Asturianu, al traviés de la so presidenta, tamién plantegó al parllamentariu otros asuntos como la necesidá de revisar los criterios llexislativos estatales en convocatories y ayudes públiques pa incluyir de forma sistemática a les llingües con protección estatutaria y xurídica ensin declaración d’oficialidá nos sos respectivos Estatutos d’Autonomía, como ye’l casu del asturianu y l’aragonés. Nesi sen, Arantza Margolles recordó que “la falta d’oficialidá nun pue ser un pilancu pa la presencia del asturianu en resoluciones, programes o cualesquier iniciativa política que dependa del Estáu. Queremos garantizar l’accesu y la presencia del asturianu nes competencies del Gobiernu d’España”.
Arantza Margolles tamién apostó por llograr la implementación de midíes que garanticen l’usu correutu de la toponimia oficial nos organismos y ministerios del Estáu y que l’usu del nome oficial de los pueblos tea afitao na Alministración central.
L’alcuentru desenvolvióse nun clima de diálogu y colaboración, con voluntá de siguir avanzando na defensa de los drechos llingüísticos y na visibilización del asturianu nos ámbitos educativos, culturales y nos medios públicos.
