Iniciativa pol Asturianu presentó les sos aportaciones al trámite de consulta pública previa de la futura Llei de Cultura y Identidá del Principáu d’Asturies, señalando importantes carencies tanto nel conteníu del borrador.
L’asociación de reivindicación llingüística llamenta que’l testu sometíu a consulta nun cumple los criterios llingüísticos aprobaos pol propiu Gobiernu del Principáu, al publicase únicamente en castellán y escluyir l’usu del asturianu y del eonaviegu, contraviniendo les directrices de comunicación institucional del sector públicu asturianu.
Asinamesmo, Iniciativa pol Asturianu considera especialmente grave que una llei destinada a regular la cultura y la identidá d’Asturies nun incluya nenguna referencia espresa a les llingües propies del territoriu, pese al so reconocimientu nel Estatutu d’Autonomía, na Llei d’Usu y Promoción del Asturianu y a lo que recueyen en materia llingüística tanto la Constitución Española como la Carta Europea de les Llingües Rexonales o Minoritaries.
La organización de reivindicación llingüística recuerda que n’otres comunidaes autónomes con llingua propia, l’idioma propiu xuega un papel fundamental como elementu esencial del patrimoniu cultural, estableciendo midíes concretes pa la so protección, promoción y normalización na vida cultural y social. Nesti sen, Iniciativa pol Asturianu reclama que la futura llei asturiana vincule de mou claru llingua y cultura, otorgando al asturianu y al eonaviegu un papel central dientro del marcu normativu pa facer efectivu l’usu de los idiomes propios na acción cultural. El colectivu de defensa del idioma considera tamién que l’ausencia de la declaración d’oficialidá pal asturianu y pal eonaviegu nun puede ser una xustificación pa l’ausencia del patrimoniu llingüísticu na futura norma autonómica.
P’acabar, Iniciativa pol Asturianu solicitó nel documentu que les sos consideraciones seyan teníes en cuenta y que la entidá seya reconocida como parte interesada nel desendolcu y tramitación de la Llei de Cultura y Identidá, reiterando la so disposición a contribuir a una norma que reflexe de mou real y efectivu la pluralidá cultural y llingüística d’Asturies. Asina mesmo, la entidá ufierta la so colaboración de mou positivu y activu col Gobiernu asturianu pa llograr una normativa plenamente consensuada y efectiva, contando coles aportaciones del texíu asociativu.
