Iniciativa pol Asturianu quier espresar el so pesar más fondu pol fallecimientu de Xesús Cañedo Valle, Chus Cañedo, una persona comprometida cola cultura y la llingua asturianes.
Xesús Cañedo Calle nació’l 9 d’avientu de 1958. Vecín del barriu de Trubia na parroquia de L’Abadía de Cenero, parroquia rural de Xixón. Taba llicenciáu en Drechu pola Universidá d’Uviéu. Esto llogrólo con muchu esfuerciu pues estudiaba abogacía peles nueches de mozu mientres trabayaba. Entamó la so carrera profesional nun bancu y darréu preparó oposiciones pa convertise n’Abogáu del Estáu.
Foi miembru activu de Conceyu Bable Xixón. Tamién militó nel Partíu Socialista Popular y después nel PSOE; en 1983 abandonó’l PSOE y en 1985, xunto con Xuan Xosé Sánchez Vicente y Carlos Rubiera, funda’l Partíu Asturianista col que pudo desendolcar un gran trabayu parllamentariu na Xunta Xeneral del Principáu d’Asturies. La so capacidá d’alcuentru y negociación llogró sacar alantre, xunto col diputáu Xuan Xosé Sánchez Vicente, l’aprobación de la Llei d’Usu y Promoción del Asturianu nel añu 1998.
Convirtióse nun referente pola so implicación y defensa del idioma, dexando una buelga valiosa tanto nel ámbitu cultural como nel ámbitu asociativu, participando tamién na Fundación Nueva Asturies. Foi una de les primeres persones n’asociase a Iniciativa pol Asturianu valorando siempres el trabayu de la organización y l’espíritu tresversal y de consensu de la mesma.
El so trabayu, interés y dedicación contribuyeron de manera significativa a la dignificación y promoción de la llingua asturiana, espublizando dellos llibros sobre refranes y sobre l’usu oral del idioma como ‘Los dioses derrotados’, ‘Refraneru asturianu’, ‘Mundu, saber y decir nel refraneru’, fechos en comuña con Xuan Xosé Sánchez Vicente.
Dende Iniciativa pol Asturianu treslladamos les nuesa sincera condolencia a la so familia, amistaes y a toles persones que güei llamenten la so perda. De manera especial a Carmela, la so vilda, a los sos fíos Antón y Nel y a les tres nietes.
