Esti 6 d’avientu celébrase’l 47 aniversariu d’aprobación en referéndum de la Constitución Española. Nesti aniversariu, Iniciativa pol Asturianu quier aprovechar pa facer, un añu más, un llamáu a los partíos políticos asturianos pa llograr l’acuerdu constitucional pal futuru de les llingües d’Asturies.
Iniciativa pol Asturianu lleva utilizando en diferentes campañes, alcuentros y actos el so lema ‘Oficialidá, el camín constitucional de futuru pal asturianu’ que resume, en definitiva, el valor constitucional de trabayu en defensa de les llingües d’Asturies amparáu pola llei cimera nel sistema xurídicu español. Nesi sen, la presidenta del colectivu, Arantza Margolles, considera qu’esti añu 2026 que ta a piques d’entamar ye una ocasión perfecta pa llograr el consensu constitucional pol idioma. “Va unes selmanes conmemorábemos los 50 años de llibertá y democracia n’España y n’Asturies. Güei facemos un llamáu a la clas política pa retomar los valores d’alcuentru, convivencia y consensu p’aprobar la oficialidá de les nueses llingües” declaró Margolles.
La representante apuntó que “50 años depués de la fin de la dictadura y a piques de media centuria de l’aprobación de la Carta Magna ye’l momentu de da-y cumplimientu a la previsión constitucional del artículu 3.2 n’Asturies que significa la declaración d’igualdá pa tola ciudadanía independientemente de la llingua que llibremente quiera utilizar”.
Arantza Margolles recuerdó amás que “los valores constitucionales tamién declaren la igualdá ente tolos ciudadanos del Estáu Español, independientemente de la llingua que s’utilice, amás de la non discriminación. Esto ye, en definitiva, garantizar la igualdá de tolos españoles. Si un falante de gallegu quier usar la so llingua en diferentes situaciones, ¿por qué non un asturfalante?”.
Iniciativa pol Asturianu fizo un llamáu tamién al Partíu Popular pa sumase a esi consensu pol patrimoniu llingüísticu n’Asturies como fai esti partíu n’otres comunidaes con llingua propia. Margolles insistió diciento que “el PP tien que se sumar a esti consensu, como lo fixo en Galicia, Baleares, Cataluña, Valencia… coles sos llingües propies. Nun vamos cansar de recorda-yos que nun ye de recibu defender la oficialidá en Ribadeo y negar en Catropol drechos llingüísticos y negar oportunidaes de futuru al asturianu y al eonaviego”.
