Yá ye posible enviar propuestes de ponencies pa presentar nel III Congresu Internacional de la Llingua Asturiana que se va celebrar en Madrid los prósimos 16 y 17 d’abril de 2026. Toles persones interesaes en presentar una comunicación puen contactar con Iniciativa pol Asturianu pa entamar la so presentación nel eventu. La ponencia tien que tar vinculada a la llingua asturiana y pue ser un analís o investigación relativo a cualesquier ámbitu del idioma (lliteratura, hestoria, llingüística, filolóxica, cultura…). La esposición pue facese desde l’ámbitu universitariu, asociativu o formativu. N’otres ediciones participaron representantes y espertes de les universidaes d’Uviéu, Ștefan cel Mare (Suceava), Vigo, Oklahoma State, California Riverside, Tennessee, Sussex, The City University of New York, París, Varsovia, Viena, Granada o Burgos.
Esti alcuentru que s’entama bianualmente (2022, 2024 y agora 2026) ta coordináu pol profesor Avelino Corral, Doctor nel Departamentu de Filología Inglesa de la Universidá Autónoma de Madrid, y collaboren Iniciativa pol Asturianu y l’Academia de la Llingua Asturiana. L’eventu pretende ser un altavoz pa la divulgación, estudiu y reflexón sobre la situación de la llingua asturiana. Al igual que la primer y segunda edición, celebraes nel 2022 y 2024 baxo’l títulu de ‘Distintividá, identidá y oficialidá’, repítese ubicación na Facultá de Filosofía y Lletres de la Universidá Autónoma de Madrid.
Portal web del III Congresu Internacional de la Llingua Asturiana
