El recintu ferial Luis Adaro, qu’estos díes acueye la 68 edición de la Feria Internacional de Muestres d’Asturies, va celebrar esti sábadu 16 d’agostu’l IV Día de la Llingua Asturiana. Una cita qu’entamen en conxuntu la Cámara de Comerciu de Xixón y l’asociación Iniciativa pol Asturianu col sofitu de más d’una decena de instituciones collaboradores. La llista d’actividaes recueye una bayura d’actividaes en diferentes espacios que pretenden faer d’esti día una xornada festiva pero tamién de concienciación y reivindicación llingüística.
El día del asturianu na Feria de Muestres va entamar enantes del meudía, a les 11:30 hores, cola inauguración institucional, que va cuntar con una apertura musical con gaita asturiana y el pregón de la periodista Inés Paz. La periodista xixonesa foi en 2013 la vocera española na LVIII edición del Festival de la Canción d’Eurovisión, na llocalidá sueca de Malmö y angüaño presenta’l matinal de RPA, La Radio es Mía. Inés Paz trabayó n’otros medios como Televisión Local Xixón, La 1, Cuatro, Telemadrid, La Sexta y TPA. Darréu d’ello, van tener llugar les intervenciones d’Álvaro Alonso, secretariu xeneral de la Cámara de Comerciu de Xixón y director de la Feria de Muestres; Ana Vanessa Gutiérrez, conseyera de Cultura, Política Llingüística y Deporte del Gobiernu del Principáu d’Asturies; y de la presidenta d’Iniciativa pol Asturianu, Arantza Margolles.
Darréu del entamu oficial, va facese una visita al espaciu de la organización nel eventu pa conocer a les diferentes firmes qu’acompañen a l’asociación a lo llargo d’estos díes. A les 12:45 hores, nel salón d’actos del pabellón del Gobiernu del Principáu d’Asturies va tener llugar una ‘clas exprés d’asturianu’ gracies a la iniciativa de Falamos.
A les 13:00 hores, la redacción del diariu El Comercio nel recintu ferial Luis Adaro va recoyer ún de los actos más emotivos de la xornada: l’homenaxe a la figura del escritor recientemente fallecíu Xuan Bello. Iniciativa pol Asturianu y el decanu de la prensa asturiana proponen una llectura ciudadana de la obra ‘Hestoria Universal de Paniceiros’ del escritor tinetense. La llectura pretende ser un reconocimientu a la so figura y a la obra más reconocida del autor.
Quince minutos dempués, la Conceyalía de Normalización Llingüística d’Avilés va presentar nel apartáu del conceyu avilesín la programación del segundu semestre de les actividaes propuestes dende dicha conceyalía. La programación va continuar cola entrega de materiales de la Conceyalía de Normalización Llingüística d’Avilés a los y les visitantes col mensaxe “Da-y a la llingua” y una visita guiada n’asturianu al pabellón de Xixón.
Yá pela tarde, a les 16:30 hores, les actividaes van siguir nesti espaciu cola proyeición del vidiu Madrellingua, coles voces, sitios y pallabres n’asturianu que más-yos presten a dalgunes persones d’Avilés, collaboradores nel videu. A la mesma hora, el pabellón de La Nueva España va acoyer un alderique col vocal d’Empresariáu y Consumu d’Iniciativa pol Asturianu, Inaciu Iglesias, acerca de cómo l’asturianu puede convertise nuna ferramienta de xeneración d’empreses, empléu y polo tanto riqueza.
A les 17:00 hores, el Conceyu de Xixón, al traviés del so Serviciu de Normalización Llingüística, entama l’actividá d’un showcooking con Panduru baxo’l título ‘La sidra y el pan como ingredientes: sabores circulares, tradición y patrimoniu asturianu’ entroncando col tema sobre’l que xira l’espaciu xixonés na Feria de Muestres nesta edición.
De magar les 18:00 hores, el Muséu del Pueblu d’Asturies va acoyer una visita guiada n’asturianu a les sos instalaciones y el Conceyu de Mieres entama una charra sobre la historia de La Danza Prima pa repartir dempués tarxetes cola lletra n’asturianu del tradicional cantar.
Les actividaes vuelven al espaciu d’Iniciativa pol Asturianu a les 18:30 hores cola presencia de Pablo Rodríguez Medina, que va firmar el so llibru ‘El pesu de la nieve’, ganador de la IV edición del premiu Andrés Solar, que cuenta la historia de Martinón, un pastor que vive nos montes de Ponga.
A les 19:00 hores, l’espaciu de promoción turística, Conceyos con Encantu, qu’abelluga a 21 conceyos asturianos, entama l’actividá ‘Atopa’l to pueblu’ na que los visitantes van colocar un puntu la so collación nun mapa d’Asturies.
La xornada va finalizar con una semeya colectiva cola pancartona d’Iniciativa pol Asturianu col mensaxe de ‘La sociedá asturiana axúntase pola oficialidá’ delantre del Palaciu de Congresos de Xixón.
Demientres tol día, en collaboración col periódicu dixital MiGijón, los internautes van poder xubir semeyes a redes sociales (Instagram y Twitter) del requexu o espaciu más guapu de Xixón utilizando’l hastag ‘SelfieXixón’. La Universidá d’Uviéu tamién va sumara a la xornada con un repartu de materiales n’asturianu.
Más d’una decena d’entidaes ente espositores, conceyos instituciones y empreses collaboren nel programa d’actividaes con motivu del IV Día de la Llingua Asturiana. Toles actividaes son de baldre y tan abiertes a la participación de los visitantes. Iniciativa pol Asturianu anima a la sociedá civil a participar nesta xornada de valoración y reivindicación del idioma.
