Iniciativa pol Asturianu rexistró’l pasáu 11 de payares una reclamación énte la Conseyería d’Educación del Gobiernu del Principáu d’Asturies en protesta pol recorte d’hores de la materia de Llingua Asturiana y Lliteratura nel Colexu de La Milagrosa de Xixón. La organización treslladaba la quexa del centru educativu pola mengua d’hores pal idioma. El centru cuntaba nel cursu anterior con 9 hores pal enseñu de la materia na etapa d’Educación Primaria (1,5 hores por nivel), cifra qu’esti cursu académicu la Conseyería baxó a 7 hores y media.
El centru educativu tien una llinia únicamente; y por mor d’esta decisión la docente tenía d’axuntar dos grupos de niveles distintos (3u y 4u primaria) conformando un grupu de más de 20 escolinos. Esta situación nun ocurría cola otra asignatura optativa (Cultura Asturiana). Tres recibir l’avisu, Iniciativa pol Asturianu presentó una reclamación a la Conseyería d’Educación del Gobiernu d’Asturies contra la decisión de quitar hora y media, obligando a axuntar dos cursos nos que se superaben los venti alumnos y pa reclamar l’ampliación d’hores pa llograr la dotación horaria a les 9 hores.
Finalmente, la Conseyería d’Educación resolvió caltener esa hora y media pa la clase de Llingua Asturiana y asina lo treslladó al centru educativu, llogrando recuperar les hores necesaries pa l’asignatura. Iniciativa pol Asturianu valora la confianza que’l profesoráu punxo na nuesa organización p’asoleyar esti casu y agradez a la Conseyería d’Educación tener en cuenta la reclamación.
