Nestes feches son munches les formaciones que mos llamen pa falar del so programa electorales al rodiu de les midíes de política llingüística. Delles d’estes fuercies lleven la promesa de trabayar pola oficialidá del idioma nel so programa y ye un fechu a reconocer y aplaudir.
Sicasí, esti sofitu programáticu ha tener consecuencies na so organización interna. Nun pue ser namás un adornu que xustifique’l so inclín asturianista. Una organización que sofita l’asturianu tien d’usar l’asturianu nel so día a día. Los represenantes de la formación han usar l’asturianu cuando falen colos medios, con normalidá, la so páxina web, les sos redes sociales… Ha cuidase que la militancia se forme nel usu del asturianu.
Esta ye la coherencia interna de la que siempres-yos falamos nestos conceyos. Pidimos-yos simplemente que llean el so programa y tomen les midíes necesaries pa que se cumpla dientro de la so organización. Imaxinái un partíu que lleva nel so programa un plan de reciclaxe p’Asturies y que dempués nun separta los residuos nes oficines de la so formación. Col asturianu ye igual, poner en marcha esta coherencia significaría más seguridá nos sos compromisos a la hora de dir a votar.
La oficialidá del asturianu ye una causa pendiente que ta cada vegada más cerca de solucionase, tamos seguros. El consensu ye cada añu mayor y les resistencies, siempres nes élites de dalgunos partíos, van valtándose pasu ente pasu. L’aplicación de la oficialidá dientro de les formaciones que la defenden, demostraría a los que tovía puedan tener duldes, que nun xenera nengún tipu de conflictu nuna sociedá democrática.