La organización Iniciativa pol Asturianu va participar de l'actividá del órganu asesor del Conceyu de Xixón en materia de Política Llingüística, al que foi convidada la organización va más d'un añu, nun siendo efectiva la mesma hasta agora, dempués de numberosos retrasos que dende'l puntu de vista de la organización "namás buscaron retrasar la puesta en marcha de l'actividá d'esti órganu", lo que demuestra la falta d'interés d'esta alministración por cuntar cola opinión de los estremaos colectivos xixoneses que participen del Conseyu.
L'órganu, formáu por partíos, sindicatos y asociaciones culturales, empresariales, etc. tien l'oxetivu de asesorar al Conceyu de Xixón. Cola última reforma de los sos estatutos, Iniciativa pol Asturianu y otres organizaciones de reivindicación llingüística entren a formar parte de la entidá con un represante por cada asociación, ensin remuneración dala.
Iniciativa pol Asturianu tará presente nesti Conseyu cola intención de facer un llabor constructivu, pero tamién sollerte a los pasos atrás que puedan dase no que cinca al usu del asturianu en Xixón, onde nos últimos años pudieron vese dellos pasos atrás y onde nun s'avanza nel cumplimientu de la ordenanza d'usu y promoción del asturianu, que s'incumple cásique dafechu dende la so aprobación.
Convidamos a los ciudadanos de Xixón a facenos llegar les sos reclamaciones y propuestes sobre normalización llingüística, col envís de poder llevales a esti foru, qu'aguardamos seya una ferramienta útil pa que se dean pasos alantre nel usu del asturianu nel conceyu de Xixón.
