L’asociación Iniciativa pol Asturianu preséntase güei, sábadu 17 d’avientu, nel salón d’actos de la Biblioteca d’Asturies, n’El Fontán, Uviéu. L’actu consistirá nuna pequeña gala con intervenciones, proyección d’audiovisuales y actuaciones musicales, amás d’otres sorpreses.

Iniciativa pol Asturianu ye una organización que ñaz pa implicar a tola sociedá asturiana nel procesu de recuperación y normalización del asturianu, y que va trabayar tanto col sector públicu como col priváu a la busca de nuevos espacios de normalidá pal idioma asturianu. L’asociación entama la so actividá pública dempués de dellos meses de trabayu discretu pa xenerar una estructura, crear la so páxina web, materiales y dir xenerando una rede de voluntariáu a lo llargo de tol territoriu asturianu.

L’actu va presentalu la periodista Mariluz Pontón y nél va poder sentise la música de Mariluz Cristobal Caunedo “la dama de la canción asturiana”, amás de Tante Blanco, ex miembru de Los Berrones. Habrá tamién espaciu pal humor, de la mano del monologuista Lluis Antón González, perconocíu pol so trabayu na TPA. Xunto a estos elementos más lúdicos, presentaránse les idees básiques del colectivu y, amás, participarán delles personalidaes de diferentes estayes de la sociedá asturiana: educación, medios de comunicación, arte y cultura… Nel actu espérense delles sorpreses que la organización entá nun desveló.

La gala va entamar a les siete la tarde y ta abierta a tolos interesaos, de baldre. En terminando, hacia les nueve, va celebrase una folixa nel chigre uvieín L’Esperteyu, asitiáu en La Caleya la Ciega.