Ufrimos un artículu d'opinión nel que Marisa Bordallo, vocal de Redes Sociales d'Iniciativa pol Asturianu, fai una áceda crítica a la falta d'usu del asturianu per parte del Presidente d'Asturies na so felicitación navidiega:


L'asturianu, ¿úlu? por Marisa Bordallo

 
¡Qué guapes les Fiestes Navidiegues! ¡Qué de bonos deseos y meyores intenciones! Un tiempu nel que los corazones tán más llenos d'amor que normalmente.
 
¡Qué prestosa la Navidá! Y, ¡cómo presten les felicitaciones! 
 
Güei despertamos cola del nuesu Presidente, Don Javier Fernández. Fízonos sentir perarguyosos y perarguyoses de les sos cualidaes llingüístiques. Políglota, plenu d'escelentes vibraciones.
 
Suecu, griegu, inglés, suomi, francés…y asina hasta 14 llingües diferentes. ¡Nun me diréis que nun ye pa sintir arguyu del nuesu Presidente! ¡Ah, ye verdá! Falla dalgo na llista…
 
L'asturianu, ¿úlu?
 
A lo meyor, tá entá escribiendo la que va unvianos a los d'esti llar nomáu Asturies que Javier gobierna. Pue ser qu'esta felicitación seya por temes de Diplomacia Internacional. Eso ye dalgo que podemos talantar.
 
De xuru que Javier va unvianos una a nós con frases como: "¡Bones Fiestes Navidiegues!" o, "¡Bayurosu añu nuevu!"
 
O quiciabes, namás fale asturianu na intimidá…
 
Dende equí, nós, deseámos-y a él ya'l so equipu un Bon Nadal ya un 2016 cargáu, nes sos comunicaciones, de la llingua de nueso. La llingua asturiana.
 
##########
 
Saludu candial collacios/-es y Bones Fiestes!