Iniciativa pol Asturianu solidarízase col vecín de La Felguera qu’esti llunes denunció un casu de discriminación llingüística al que se-y torgó’l derechu de camudar de manera oficial el so nome y apellíu al asturianu. La organización, conocedora del casu dende va tiempu, llamenta esta situación pola única intención del ciudadanu de ver reconocíu de manera oficial el nome col que siempres s’identificó. Dempués de tantos pilancos y tantos años de normalización del idioma, resulta increíble les trabes coles que s’alcuentra una persona pa poder poner el so nome (Xicu) y apellíu (Ilesies) n’asturianu.
Iniciativa pol Asturianu presentó va tres años el documental ‘La vida ensin oficialidá: Les consecuencies de la falta de drechos llingüísticos n’Asturies’ nel que se repasen los problemes qu’atopa una persona dende que naz hasta que muerre por querer usar llibremente la llingua asturiana. El casu de Xicu Ilesies supón un capítulu nuevu de discriminación llingüística a esa llista que presentemos.
Amás d’espresar públicamente’l sofitu al afectáu, la organización quier reclamar una mayor sensibilidá llingüística a les persones que xestionen esti tipu de solitúes que s’alcuentren amparaes pola Llei de Rexistru Civil nos sos artículos 52, 53 y 54 relativos a los cambeos de nome.
Nesi sen, Iniciativa pol Asturianu recuerda que pa faer el cambéu de nome al asturianu lo primero ye solicitar un certificáu a l’Academia de la Llingua Asturiana, después ye necesario facese con un certificáu d’empadronamientu del conceyu. Darréu, pidir una copia del certificáu de nacencia nel Rexistru Civil. El pasu final, enantes de solicitar el cambiu del DNI, ye dir al Rexistru Civil correspondiente colos trés certificaos, la instancia y una fotocopia del DNI. El trámite ‘Adaptación del nome al idioma de la CA’ ye inmediatu y nun tien costu nengún.
