La Xunta Direutiva d'Iniciativa pol Asturianu aconceyó esti miércoles 30 de mayu pa tratar les cuestiones organizatives de cara a esti branu. Nel conceyu planificáronse próximes campañes, la creación d'un nuevu modelu de sociu basáu na aportación de tiempu de trabayu a un bancu d'hores, creación d'audiovisuales y la organización de la presencia na cai nos meses vinientes, ente otres cuestiones.
Inaciu Galán, presidente d'Iniciativa pol Asturianu faló nel diariu El Comercio de l'actividá de la organización y del presente y futuru del idioma. Recoyemos les entrugues y respuestes que cinquen a esta cuestión.
Esti sábadu, 26 de mayu dende les seis de la tarde, voluntariáu d'Iniciativa pol Asturianu va tar presente repartiendo información de la organización na folixa del Descorche, organizada pola Sociedá Cultural y de Fiestes de L'Entregu nel parque de La Llaguna. Nel eventu, que se celebra nel conceyu de Samartín del Rei Aurelio, va repartise material informativo de la organización y va animase a los asistentes a tomar la iniciativa y facese socios d'Iniciativa pol Asturianu.
Nes oficines del Centru Asturianu de Madrid, asitiáu na cai Farmacia, esquina con cai Fuencarral, nel centru de Madrid, pueden solicitase folletos informativos d’Iniciativa pol Asturianu. Dende Iniciativa pol Asturianu agradecemos la disponibilidá d’esti hestóricu centru asturianu pa cola nuesa organización.
La organización Iniciativa pol Asturianu ta acabante firmar un conveniu con Splitweet, un xestor de cuentes de Twitter pol que la plataforma ufre dende agora una versión n’asturianu de tol sistema, lo que permite usar Twitter dafechu n’asturianu, pudiendo xestionar amás delles cuentes al mesmu tiempu. El sistema permite usar Twitter dende la plataforma Splitweet con tolos mesmos servicios qu’esisten na web d’esta rede social.
El programa "Nueches de radio", de la emisora Radio Sele entrevistó'l pasáu 3 d'abril a Inaciu Galán, presidente d'Iniciativa pol Asturianu. Na entrevista falóse de la creación de la organización y los primeros meses d'actividá.
El llunes 14 de mayu, a les seis de la tarde, na Facultá de Formación del Profesoráu y Educación de la Universidá d'Uviéu, el Conseyu d'Estudiantes de la Universidá d'Uviéu axunta nuna mesa redonda titulada "Llingua asturiana na Universidá d'Uviéu: ¿Y agora, qué?", na que va participar Inaciu Galán, presidente d'Iniciativa pol Asturianu, xunto a representantes d'otres organizaciones. Na mesa va reflexonase sobre la situación presente del idioma na institución académica -tanto del puntu de vista del so usu como del so estudiu-, arriendes de les posibilidaes y estraxes futures nel camín pa la so normalización.
La dirección d'Iniciativa pol Asturianu quier espresar el so sofitu a la familia, compañeros y amigos de Sergio Marqués, ex Presidente d'Asturies, recordando'l so compromisu cola llingua asturiana, que lu llevó a convertise nel únicu presidente qu'aprobó una Llei d'Usu del Asturianu nos más de trenta años d'autonomía asturiana.
El vienres 4 de mayu, voluntariáu d'Iniciativa pol Asturianu repartió miles de folletos informativos de la organización peles cais d'Uviéu, a lo llargo de tola tarde. Darréu participaron na manifestación pola oficialidá entamada pola Xunta pola Defensa de la Llingua Asturiana, percorriendo colos petos identificativos les cais d'Uviéu y reclamando la oficialidá pal nuesu idioma. A lo llargo de la xornada nueves persones tomaron la iniciativa pol asturianu y decidieron facese socios d'Iniciativa pol Asturianu.
Esta selmana tamos en plena celebración de la Selmana de les Lletres Asturianes y taremos presentes en dellos actos con materiales nuevos pa siguir trabayando por llegar a la xente col nuesu mensaxe. El xueves 3, n'Avilés, convidaos a una clas d'asturianu na cai por Compromisu por Avilés, dellos miembros de la organización tuvieron na Plaza'l Parche dando a conocer la organización a los participantes nel actu y a la xente que taba pela plaza avilesina.

SÍGUINOS

7,646SiguidoresPréstame
1,359SiguidoresSiguir
5,762SiguidoresSiguir
300soscriptoresSoscríbite

Últimes noticies