Col oxetivu de llegar a cada vegada más asturianos, Iniciativa pol Asturianu suma a una emisora más, Radio L.lena, a la rede de radios qu'emiten el so programa, Iniciativa pol Asturianu nes ondes. Radio L.lena súmase asina a esti proyectu al que yá se sumaren Radio Sele, AllerFM, Radio UJO y la emisora de Bruseles, Radio Alma, que va llevar a los emigrantes asturianos na capital belga, les noticies de la reivindicación llingüística. El programa puede sentise amás na canal d'Ivoox de la organización.
La Romería de la Oficialidá, que se celebró en Martimporra, Bimenes, esti sábadu 16 de xunu, recibió al equipu de voluntariáu d'Iniciativa pol Asturianu de forma mui positiva. A lo llargo de la xornada miembros de la organización atendieron a los interesaos en recibir información nun puestu asitiáu na carpa de la fiesta pel que pasaron cientos de persones. Na xinta popular celebrada nel poliderportivu con más de 300 persones, miembros d'Iniciativa pol Asturianu tuvieron faciendo un repartu de folletos ya informando nes meses sobre'l llabor de la organización.
El programa d'Iniciativa pol Asturianu sigue sumando emisores peles que se radia. Dempués del ésitu de la primer edición del programa, que yá s'emite en Radio Sele, AllerFM y Radio Ujo, agora súmase a esti llistáu Radio Alma, emisora multillingüe de Bruxeles, capital de Bélxica, onde va poder sentise'l programa d'esta organización. Radio Alma, emisora fundada en 1978 pa la emigración presente na ciudá, n'especial de llatinoamérica y el sur d'Europa, emite en tola contorna de Bruxeles al traviés del 101.9 de la FM, amás de pa tol mundu al traviés de la so páxina web. L'asturianu y les noticies sobre la reivindicación llingüística van llegar agora a los miles d'asturianos que viven na capital europea.
La revista "Les Fueyes de La Semiente", d'esti centru social de L'Entregu asoleyó va delles selmanes una entrevista col presidente d'Iniciativa pol Asturianu. Reproducimos la entrevista completa.
Esti sábadu 16 de xunu miembros d’Iniciativa pol Asturianu van desplazase a Martimporra, cabeza del conceyu de Bimenes, pa participar nos actos de la Romería pola Oficialidá, onde se la organización cede un espaciu pa poner un puestu informativu, pa danos a conocer, captar asociaos nuevos, etc. Convidámosvos a participar como parte del equipu de Voluntariáu pa esi día. L'actividá d'Iniciativa pol Asturianu pel llugar de la fiesta entamará a les 11 la mañana.
Iniciativa pol Asturianu sigue faciendo por meyorar la so comunicación y coincidiendo colos seis meses del entamu de la so actividá pon en marcha una nueva iniciativa, un programa radiofónicu mensual que va dar anuncia de les actividaes de la organización. El programa llámase Iniciativa pol Asturianu nes ondes y ta dirixíu por Samuel Gradín, llocutor con llargos años d’esperiencia en medios como La Voz de Galicia o la RPA. A lo llargo de los alredor de sesenta minutos que va durar la emisión va haber tiempu pa conocer les noticies del movimientu de reivindicación llingüística, entrevistes, música y hasta un pequeñu espaciu pa deprender asturianu.
La vocalía de dominiu llingüísticu de la organización, coordinada por Denis Soria, quier espresar el so maltar énte la negativa de discutir una moción n'amparu del patrimoniu llingüísticu na Diputación de Zamora. La iniciativa defendida pol grupu ADEIZA que daba un primer pasu na conquista de los drechos llingüísticos básicos (con midíes de proteición, promoción, recuperación toponímica o refuerzu institucional de la creación cultural y lliteraria de la llingua asturiana/lleonesa y gallega na Provincia de Zamora) partió del coleutivu Furmientu, una de les organizaciones qu'integren el movimientu de reivindicación llingüística al sur del cordal y cola qu'Iniciativa pol Asturianu aconceyara'l pasáu 31 de marzu n'Estorga (Lleón).
El presidente d'Iniciativa pol Asturianu, Inaciu Galán, tuvo esti llunes na sede de la Real Academia Española (RAE), na cai Felipe IV de Madrid presentando en mano énte la RAE l’informe tituláu “Definir el términu “asturianu” con xeitu. Informe sobre la presencia del vocablu “asturianu” y otros términos nos diccionarios normativos d’otres llingües”. Alredor de les doce la mañana Galán presentó una copia d’esti informe y del llistáu d’avales que lu sofiten nes oficines de l'Academia.
El presidente d'Iniciativa pol Asturianu, Inaciu Galán, tará esti llunes en Madrid pa presentar en mano ante la Real Academia Española (RAE) un informe tituláu “Definir el términu “asturianu” con xeitu. Informe sobre la presencia del vocablu “asturianu” y otros términos nos diccionarios normativos d’otres llingües”. Un trabayu que propon a la Real Academia Española que’l términu “asturianu” dexe de referise a “dialecto”, pa responder a la realidá ciéntifica y llegal, que dexa a les clares que l’asturianu ye un idioma.
La plataforma Ivoox cunta dende esta selmana con una canal d'audios d'Iniciativa pol Asturianu onde la organización va incluyir entrevistes y otros materiales d'audiu venceyaos a l'actividá de la organización.

SÍGUINOS

7,646SiguidoresPréstame
1,359SiguidoresSiguir
5,759SiguidoresSiguir
300soscriptoresSoscríbite

Últimes noticies