Asturianos y descendientes siguen el cursu a distancia dende distintos llugares fuera d’Asturies
Iniciativa pol Asturianu, el Conceyu Universitariu pol Asturianu (CUPA) y l’Academia de la Llingua Asturiana (ALLA) entamen la que ye la cuarta edición de los Cursos d’Asturianu en Xixón esti martes 13 de mayu dende les 15 hores y hasta les 21, nel Conseyu de la Mocedá de Xixón (Avenida Manuel Llaneza 68, baxu).
Iniciativa pol Asturianu valora mui positivamente esta esperiencia formativa que s’entama per cuarta ocasión en collaboración cola Academia de la Llingua Asturiana y que tuvo una perbona acoyida, con más de 40 alumnos inscritos, de dellos conceyos d’Asturies, amás de persones de fuera del país. Xente interesao pol asturianu de Méxicu, onde una familia de la diáspora asturiana tien apuntaos a cuatro miembros, o asturianos que tán viviendo fuera, en Galicia, Navarra y otros llugares.
El cursu cunta con 36 hores llectives y va celebrase los martes y xueves, de 17 a 19 nel nivel II y de 19 a 21 hores pal nivel básicu, hasta finales de xunu. Pensáu pa dar una conocencia básica y adaptada al nivel del alumnáu de la llingua asturiana, deprendiendo les normes ortográfiques, vocabulariu y otres cuestiones, trabayando tamién cuestiones rellacionaes cola sociollingüística y la cultura d’Asturies.
