OCHO AÑOS TRABAYANDO POL CONSENSU. OXETIVOS ALGAMAOS. XERES PENDIENTES.
Xixón, 22 de xunu de 2019
Inaciu Galán, Presidente saliente d’Iniciativa pol Asturianu
Mui bones tardes:
Estes son les pallabres caberes que voi dicir como Presidente d’Iniciativa pol Asturianu y nun puedo dexar de sentir un daqué d’emoción al despidime d’esti cargu que fixi por llevar de la meyor manera que supi.
Cuando estos díes me plantegaba qué dicir nestes pallabres finales, volví sobre los mios pasos hasta l’artículu que mos llevó a fundar esta organización. Asoleyábalu nel branu del añu 2011 n’Asturnews embaxo’l títulu “La esmolecedora situación del movimientu de reivindicación llingüística”, y nél facía repás a cómo yo vía que taba naquel momentu esti llabor. Con tol respetu pal trabayu que se venía faciendo paecíame que dempués de más de trenta años naquel momentu, daqué nun se taba faciendo bien, o podía meyor, o d’otru xeitu. Eso venía a proponer, nueves formes de trabayar, más diálogu, más tresversalidá na reivindicación, menos agresividá y más busca d’alcuerdos y consensos.
Remataba aquel artículu con una fras “Nun podemos siguir caminando pel camín que mos marquen otros. Ye’l momentu de convertir l’esmolecer n’acción. ¿Sedremos quién?”. Güei, cuasi nueve años más tarde camiento que la respuesta pue ser sí, fuimos quien, o sí, tamos siendo quien.
Nun soi mui amigu de dedicar demasiao tiempu a falar d’Iniciativa pol Asturianu como organización, porque entiendo les entidaes non como ser d’un equipu de fútbol, con pasión ciega, igual ye porque nun soi mui futboleru. Les organizaciones véoles como ferramientes pa los oxetivos que se planteguen y por eso me presta Iniciativa, porque creo que tuvo y tien esa utilidá, que fai coses significatives y que ye una voz que se tien en cuenta y que diz coses qu’aporten en positivo.
Y como tamos nel nuesu congresu, voi dicivos una cosa, norabona, norabona por formar parte d’esta entidá que supo construyir un discursu propiu, que supo tar trabayando con visibilidá, tola que pudimos cuando yera necesario, y con discrección absoluta, tola que foi posibile, cuando les situaciones requeríen actuar d’esa manera.
Como sabéis, dende’l principiu tomóse la decisión de nun solicitar ayudes públiques, guardando la máxima independencia y autonomía. Creo qu’acertemos. Nun pienso que fuéramos menos independientes, pero con esta fórmula cada sociu, cada socia, ye responsable de caltener iniciativa. Y güei con cerca de quinientos socios y socies tenemos una autonomía financiera, una estructura que yá ta mui afitada y un trabayu del día a día que ta mui procedimentáu y solventáu cola secretaría técnica que creemos va unos años y que con tantu aciertu ta xestionando dende va unos meses Xuan Pandiella.
Iniciativa pol Asturianu vieno a aportar y a sumar, non a tar n’engarradielles absurdes. Y consiguímoslo. Collaboremos con toles entidaes que mos tendieron la mano. Tamién creo que fuimos quien a introducir un ambiente más optimista nun movimientu que tiende a ser mui derrotista, con iniciatives como “Les meyores noticies del añu pal asturianu” y una continua xestión de les victories, anque fueren pequeñes, dando aire a la xente que cada día llucháis pol asturianu.
A nivel social, que ye lo más importante, paezme que fuimos quien a camudar la imaxe que la sociedá y los medios teníen del movimientu de reivindicación llingüística. Agora vennos como un colectivu más constructivu, más seriu, menos agresivu, y paezme qu’eso ye mui positivo a la hora de poner sobre la mesa les nueses reivindicaciones. Esto permitió, amás, que dientro d’Iniciativa pol Asturiana entrara xente de toles sensibilidaes y de tolos partíos, y que pudiéramos trabayar de cerca coles organizaciones polítiques, que son les qu’al final, xunto a la ciudadanía, tienen que dar los pasos pa que l’asturianu tenga futuru.
Consiguimos crear una organización mui tresversal, na que conviven persones de tolos ámbitos de la sociedá y de toles ideoloxíes, con persones independientes, militantes y simpatizantes de toles organizaciones polítiques, xente que fala asturianu y xente que non. Dalgo que podría sonar raro va unos años, pero que tamos normalizando, consiguiendo que nun se vea la llucha pol futuru del asturianu como daqué que namás correspuende a los y les falantes, sinón a toles persones que valoren esta llingua y que quieren trabayar pa que los sos falantes vivan con plena llibertá pa usala en tolos ámbitos.
Depués hai munchos proyectos de la organización que creo que sumen abondo dende distintos ámbitos, la presencia coles empreses qu’usen l’asturianu na Feria Muestres, un trabayu xigante nes redes sociales, los programes de cursos presenciales y a distancia, pelos que pasaron cientos y cientos d’alumnos y alumnes, el programa de radio y Alderiques d’Asturies, que xestiona Samuel Gradín con un llabor inmensu. Nun puedo citar a toles persones qu’aportastis trabayu a lo llargo d’estos años, polo que voi facer un agradecimientu xeneral.
El llabor fechu, nun lo duldéis, tien muncho que ver na situación que tenemos agora. Nun pasen les coses simplemente porque sí, sinón que detrás de los cambios políticos de los últimos años hai un llabor que si siguimos faciéndolu con intelixencia, va llevanos a consiguir tolos oxetivos plantegaos.
Entá nun fuimos quien a consiguir la oficialidá. Que nun escaezamos nunca, ye una ferramienta oxetivu, non un oxetivu final en sí. Pero toi tranquilu. Si facemos les coses bien vamos consiguilo pronto. Agora toca dialogar muncho y facer pocos esparabanes. Hai que midir mui bien los pasos y nun quemar cartuchos de forma innecesaria. Los nervios, les prieses, yá viemos a onde lleven. Afitemos el sofitu a la oficialidá, garanticemos que tenga los votos, y entós, sí, trabayemos pa que s’abra de forma rápida la reforma del Estatutu, na mio opinión, nuna reforma amplia que nun focalice tola cuestión na oficialidá, porque eso ye lo que quieren precisamente los enemigos del asturianu. Nun tien nengún sentíu dir a una derrota parllamentaria cuando tamos nun momentu nel que podemos consiguir la victoria. Y nesti momentu la opción más factible pasa por que Foro vuelva a la postura favoratible a la oficialidá. Magar que nun tenemos que dexar de trabayar nel diálogu con PP y Ciudadanos, porque’l consensu ha ser lo más ampliu posible que podamos.
Nun hai que tener prexuicios. Nestos años conocí xente que nunca pensé que sofitaría la oficialidá y que col pasu los años, camudó de postura. Nunca deamos a naide nin a nenguna organización por perdida en sumase a la causa. Porque en 2011, munchos tomábenme por llocu cuando pensaba que podríemos consiguir convencer a la FSA y que tendríemos les mayoríes pa la oficialidá a nun tardar, quién que tendríemos un rector falando asturianu y un llogotipu col asturianu presente na Universidá d’Uviéu, quién que s’aprobaríen los niveles europeos pal enseñu del asturianu, y tantes y tantes coses positives que pasaron estos años.
Nun dexemos nunca que’l pesismismu, que’l derrotismu, mos tenga paraos o enrrocaos, o zarraos a la sociedá, viéndola como enemiga. Porque la mayoría de la xente que tovía ta en contra de la oficialidá, failo dende la posición de falante represaliáu, de ciudadanu o ciudadana influyíu por unes élites polítiques que lleven munchos munchos años llanzando mensaxes negativos.
Nuna ocasión fui a entregar una documentación del doctoráu nel rexistru de la universidá y una funcionaria saltó de forma agresiva, intransixente y enllena de prexuicios, al ver qu’aquellos papeles taben n’asturianu. Namás tenía que metelos nel rexistru, nun tenía nin que lleelos. Presenté una quexa y la Universidá iguó la situación. Años más tarde volví per aquel rexistru. Y yá nin m’alcordaba daquella situación tan desgradable que viviera ellí. Di-y el papel que llevaba una funcionaria y al veme díxome: Tu y yo tuvimos un problema un va unos años, verdá? Miréla y quixi recordala vagamente. Entós garróme les manes y hasta emocionada, disculpóse. Nun fixi aquel día, nun tuvi correcta. Yá te vi nel periódicu, ¿Qué tas faciendo la tesis n’asturianu? díxome. Ah, qué guapo, díxome. Felicitóme y deseóme muncha suerte. Quedé ablucáu. Naide la obligara dempués de tantos años a dicime nada. Y préstame pensar, y toi seguru que ye asina, que nestos años, munches persones que mos sintieron, que lleeron les nuestres reivindicaciones, tamién vivieron esti cambiu mental de postura al respective del usu del asturianu. Y por eso facemos esti trabayu, pa convencer, non pa vencer, pa ganar aliaos y non enemigos.
Y mientres siguimos trabayando pa consiguir la oficialidá, tenemos d’esbrexar pa que los partíos que lleven la oficialidá nel porograma, impulsen midíes muncho más ambicioses dende’l gobiernu d’Asturies y los cuasi setenta conceyos que gobiernen. Nun pue ser que’l sofitu a la oficialidá quede nel programa y dempués nun se vea reflexáu en midíes concretes nes polítiques del día a día, onde gobiernen.
Como sabéis, dempués la nueche electoral d’infartu, los votos de la FSA-PSOE, Podemos ya Izquierda Xunida, que lleven esplícita la oficialidá nel programa, sumen 26 diputaos. Y son necesario 27 pa facer la reforma estatutaria. Préstame pensar, y n’eso soi optimista, que los dos diputaos de Foro Asturias pueden sumase a esa mayoría y consiguir los 27 que faen falta pa consiguir 3/5 de la Xunta Xeneral. Pero nun va ser un camín fácil, como tampoco lo foi dir convenciendo a les distintes fuercies polítiques nestos cuarenta años. Hai que recordar qu’en 1987 nun había un solu diputáu favoratible a la oficialidá nel parllamentu asturianu. Eso faime ser mui optimista, porque vamos siempres a meyor. Agora con calma, con optimismu, con moderación, con trabayu continuáu, consiguiremos tamién esto.
Nestos años consiguimos tamién que la situación del asturianu seya muncho más conocida n’otres partes del estáu y d’Europa. Al poco de nacer, en 2011, fuimos fundadores xunto a entidaes de tol continente d’ELEN (European Language Equality Network), una entidá gracies a la que tuvimos presente y tenemos voz en foros internacionales de la importancia del Parllamentu Européu, el Conseyu d’Europa y l’Altu Comisionáu de Drechos Humanos de la ONU. Esto fixo qu’aumentara la presión internacional y tamién que se conoza más la realidá llingüística d’Asturies y del restu de territorios onde l’asturllionés ye llingua propia.
Tamos tamién n’otra entidá, l’Asociación poles Llingües y les Cultures Europees Amenazaes (ALCEM) y collaboramos con entidaes de Llión y de Miranda del Douru de forma continuada, tendiendo pontes dientro del dominiu llingüísticu. Creo que tenemos de siguir nesi camín.
Ye un momentu positivu y apasionante, pues nel ámbitu de les instituciones tamos tocando la posibilidá de que la oficialidá seya una realidá y hai que siguir trabayando n’ello, ensin escaecer que mientres, como vos dicía, hai que siguir dando pasos alantre nel marcu actual.
Hai munches coses que siguir faciendo, como fiximos nel dos ediciones del Seminariu: oficialidá, el camín constitucional de futuru pal asturianu, que permitieron dar información a la sociedá, a la prensa y a la clas política, axuntar a persones mui relevantes alredor de la oficialidá, siguir trabayando nel consesu. Creo qu’esi ye tamién un camín.
Despídome de la primer responsabilidá d’Iniciativa pol Asturianu pero nun me despido del trabayu. Yo voi siguir aportando a la organización lo que me pidáis, porque tengo un compromisu vital con esta causa, pero llevo ocho años de gran intesidá y amás, fieles a aquellos valores colos qu’entamemos, tomar la iniciativa, renovar les formes, nun podemos dexar que la organización siga siempres representada poles mesmes persones.
La candidatura presentada güei paezme que ye un equipu impresionante, pol amiestu de mocedá y esperiencia, de xente con distintes capacidaes y conocencies en tolos ámbitos. Y toi seguru que garantiza qu’Iniciativa pol Asturianu siga con puxu esti camín qu’entamemos va cuasi nueve años.
Pela mio parte, davos les gracies, inmeneses gracies pola confianza, pol sofitu, pol trabayu, por too. Y mil disculpes por tolos errores que pudi cometer que de xuru fueron munchos y qu’espero que pudiera compensar con dalgún qu’otru aciertu.
Munches gracies. Y nada, siguimos viéndonos.
