• Iniciativa pol Asturianu nes ondes va poder sentise en Bélxica

    Espublizao 18/06/12

    El programa d'Iniciativa pol Asturianu sigue sumando emisores peles que se radia. Dempués del ésitu de la primer edición del programa, que yá s'emite en Radio Sele, AllerFM y Radio Ujo, agora súmase a esti llistáu Radio Alma, emisora multillingüe de Bruxeles, capital de Bélxica, onde va poder sentise'l programa d'esta organización. Radio Alma, emisora fundada en 1978 pa la emigración presente na ciudá, n'especial de llatinoamérica y el sur d'Europa, emite en tola contorna de Bruxeles al traviés del 101.9 de la FM, amás de pa tol mundu al traviés de la so páxina web. L'asturianu y les noticies sobre la reivindicación llingüística van llegar agora a los miles d'asturianos que viven na capital europea.

  • Entrevista en Les Fueyes de La Semiente

    Espublizao 17/06/12

    La revista "Les Fueyes de La Semiente", d'esti centru social de L'Entregu asoleyó va delles selmanes una entrevista col presidente d'Iniciativa pol Asturianu. Reproducimos la entrevista completa.

  • Puestu informativu na Romería de la Oficialidá en Bimenes

    Espublizao 15/06/12

    Esti sábadu 16 de xunu miembros d’Iniciativa pol Asturianu van desplazase a Martimporra, cabeza del conceyu de Bimenes, pa participar nos actos de la Romería pola Oficialidá, onde se la organización cede un espaciu pa poner un puestu informativu, pa danos a conocer, captar asociaos nuevos, etc. Convidámosvos a participar como parte del equipu de Voluntariáu pa esi día. L'actividá d'Iniciativa pol Asturianu pel llugar de la fiesta entamará a les 11 la mañana.

  • Estrénase programa de radio mensual: Iniciativa pol Asturianu nes ondes

    Espublizao 08/06/12

    Iniciativa pol Asturianu sigue faciendo por meyorar la so comunicación y coincidiendo colos seis meses del entamu de la so actividá pon en marcha una nueva iniciativa, un programa radiofónicu mensual que va dar anuncia de les actividaes de la organización. El programa llámase Iniciativa pol Asturianu nes ondes y ta dirixíu por Samuel Gradín, llocutor con llargos años d’esperiencia en medios como La Voz de Galicia o la RPA. A lo llargo de los alredor de sesenta minutos que va durar la emisión va haber tiempu pa conocer les noticies del movimientu de reivindicación llingüística, entrevistes, música y hasta un pequeñu espaciu pa deprender asturianu.

  • Iniciativa pol Asturianu llamenta'l vetu a los drechos llingüísticos en Zamora

    Espublizao 07/06/12

    La vocalía de dominiu llingüísticu de la organización, coordinada por Denis Soria, quier espresar el so maltar énte la negativa de discutir una moción n'amparu del patrimoniu llingüísticu na Diputación de Zamora. La iniciativa defendida pol grupu ADEIZA que daba un primer pasu na conquista de los drechos llingüísticos básicos (con midíes de proteición, promoción, recuperación toponímica o refuerzu institucional de la creación cultural y lliteraria de la llingua asturiana/lleonesa y gallega na Provincia de Zamora) partió del coleutivu Furmientu, una de les organizaciones qu'integren el movimientu de reivindicación llingüística al sur del cordal y cola qu'Iniciativa pol Asturianu aconceyara'l pasáu 31 de marzu n'Estorga (Lleón).

Videu destacáu

Protocolu Garantía de los Drechos Llingüísticos

El Protocolu pa la Garantía de los Drechos Llingüísticos ye un documentu internacional que quier ser una continuación de la Declaración Universal de los Drechos Llingüísticos aprobada va agora venti años.