Nel nuesu programa de güei falamos con Xose B. Álvarez, vocal de Rellaciones Internacionales d'Iniciativa pol Asturianu, entidá miembru d'ELEN (l'acrónimu n'inglés de la Rede Europea d'Igualdá Llingüística) porque fai unos díes vien d'asoleyar un informe pa la Revisión Periódica Universal (UPR) de les Naciones Xuníes no que cinca a los casos de discriminación y ataques escontra los falantes de llingües estremaes del castellán nel Estáu español.
L'informe detalla casos específicos d'ataques y discriminación escontra falantes d'aragonés, asturianu, catalán, gallegu y vascu nel periodu ente 2007 y 2013.
Una delegación de representantes d'ELEN atendió'l xueves 21 a la sesión de la UPR onde l'Informe de Derechos Humanos del Estáu español foi revisáu pol Reinu Xuníu, Sierra Lleona y Macedonia.
Los miembros d'ELEN pertenecientes a Iniciativa pol Asturianu informen de más de 25 casos de seria discriminación llingüística hacia los falantes d'asturianu. Los casos incluyíos nel informe son solamente una parte de la discriminación que realmente asocede, yá qu'en munchos casos les víctimes d'esos abusos illegales nun informen d'ello y nun algama les ONGs o los medios.
