Los V Cursos d'Asturianu en Xixón celebren el 10 d'avientu la so xornada de pieslle, pero enantes esti miércoles 3, ta programa una xornada con dos charres como formación complementaria pal alumnáu. Les charres ábrense al públicu col envís de dar a conocer los cursos d'asturianu d'Iniciativa pol Asturianu, organizaos xunto cola Academia de la Llingua Asturiana y el CUPA en Xixón.
La primer charra va protagonizala de magar les cinco la tarde, Pablo A. Quiroga Prendes, maestru d'asturianu y miembru de la productora Algamar. Na so intervención falará de la so esperiencia nel audiovisual asturianu, como productor musical, de cine, creador de publicaciones como la revista cultural n'asturianu Vërtigu y otros munchos de los sos proyeutos culturales.
A les 18:45 sedrá'l turnu de Javier Cuberu, autor de dellos trabayos alredor de la hestoria de la lliteratura asturiana venceyada a autores carlistes, asina como d'otres cuestiones, asoleyando en revistes como Erada. Revista d’Historia Contemporánea d’Asturies, Formientu. Revista de lliteratura mui moza, N’Ast. Cartafueyos d’ensayu y Asturies. Memoria encesa d’un país. La so charra va titulase "Conceyu Bable y la reinvención del asturianismu", cuntando con un alderique posterior colos presentes alredor de la cuestión.
