La inauguración tendrá llugar a les 19 hores nel Conseyu de la Mocedá de Xixón
Iniciativa pol Asturianu y l’Academia de la Llingua Asturiana (ALLA) celebren esta tarde la inauguración de los Cursos d’Iniciativa pol Asturianu, que se faen esti añu en Xixón, Uviéu, Sotrondio, Ribeseya, Ibias y na modalidá a distancia. La inauguración de los cursos sedrá güei, llunes 19 d’ochobre a les 19 hores nel Conseyu de la Mocedá de Xixón (Avenida Manuel Llaneza 68, baxu)
Na inauguración de los cursos van participar, xunto a los alumnos, Fonsu Martín, profesor de los cursos en Xixón, ya Inaciu Galán, presidente d’Iniciativa pol Asturianu y coordinador de los cursos. Esta ye la inauguración central de los cursos, pero a lo llargo de la selmana van celebrase otros actos n’Uviéu y Sotrondio, colos alumnos de los respectivos conceyos.
Iniciativa pol Asturianu valora mui positivamente esta esperiencia que tuvo una perbona acoyida, con más 120 matriculaos nesta primer esperiencia convocando cursos nun ambiciosu plan formativu a lo llargo de toa Asturies. Yera la primer vegada qu’Iniciativa pol Asturianu convocaba cursos d’asturianu en más de 14 conceyos al mesmu tiempu y el resultáu foi mui positivu, triplicando la matriculación a les anteriores convocatories, cuando namás se ficieron cursos en Xixón.
Nesta edición hai alumnos matriculaos, que siguen el cursu a distancia al traviés d’una plataforma de cursos en llinia basada en Moodle, dende Italia, Estaos Xuníos, Méxicu, Inglaterra, y comunidaes como’l País Vascu, Cataluña, Madrid, Balears o La Rioja. La mayoría son asturianos emigraos o fíos d’emigrantes asturianos, pero tamién hai alumnos qu’ensin tener rellación con Asturies quixeron interesase por esta llingua europea cada vegada más conocida internacionalmente.
