Ufrimos equí ''Un proyeutu d'escuela asturiana", artículu d'opinión de Xosé B. Álvarez, vocal de Rellaciones Esteriores d'Iniciativa pol Asturianu. Un artículu nel que propón un proyeutu ambiciosu pa crear una rede educativa col asturianu como llingua vehicular.

Trenta y un años llevamos yá de presencia de l’asignatura de Llingua Asturiana na educación. Trés décades onde’l númberu d’estudiantes del nuestru idioma nel sistema educativu pasó de 350 nel primer añu a más de 20.000 nel caberu llustru. Trés décades, nes que l’idioma pasó de ser un oxetu d’esperimentación na sociedá a una asignatura que per un tiempu asitiárese con fuercia, particularmente nel currículum de Primaria.

 

 

Sicasí, el pasu los años y la medría nel númberu d’alumnos nun paez que tea teniendo denguna repercusión significativa na situación social del idioma. L’asturianu sigue perdiendo falantes y la mocedá sigue perdiendo contautu cola llingua día tres día. L’asturianu, en resumíes cuentes, nun ta en procesu de recuperación.

 

Caltener vivu un idioma primeru y facelu medrar dempués nun ye realizable cuando la única ferramienta educativa al algame ye una asignatura optativa que, dende la situación llaboral de quien la imparte, a les alternatives d’estudiu de quien la deprende, tán enfotaes a amenorgar el númberu d’estudiantes y el so estatus.

 

La educación ye un exe vertebrador d’un idioma, pero esi papel ye efeutivu únicamente cuando l’idioma nun ye solo l’oxetu d’estudiu, sinon la vía de deprendimientu d’otres disciplines. Cuando l’alumnáu caltién l’únicu contautu col idioma estudiándolu cuerre’l peligru de que nun lu perciba como una ferramienta útil na so vida, sinón como una asignatura más o dalgo que nun tien llugar fuera d’un aula.

 

Si queremos que l’asturianu pase realmente a ser la vía de comunicación de la mocedá, si queremos que’l país vuelva a recurrir al so idioma fuera de militancies y razones ideolóxiques, ye imperativu que tresformemos el sistema educativu pa que l’asturianu nun sía más un espaciu d’una o dos hores a la selmana, sinón la ferramienta cola que la mocedá asimile nuevos conocimientos, dende les matemátiques a la hestoria, dende l’arte a la informática. Solo asina entamará’l pueblu a percibir nuevamente la llingua asturiana non como oxetu de militancia, sinón como preséu de comunicación. 

 

Ta nes nuestres manes cambiar el rumbu. Les instituciones españoles y del Principáu nun amuesen la más mínima intención de dar esti pasu tan necesitáu, y esa ye la razón de que seya’l pueblu asturianu’l que dea’l pasu nel so llugar. Ye la hora de qu’asociaciones, organizaciones, movimientos y militantes trabayemos xuntos pa construyir una cadarma educativa alternativa. Un sistema llibre, abiertu, onde dende’l voluntariáu averemos los conocimientos a la mocedá al traviés del nuestru idioma. Entamemos un proyeutu d’escuela llibre y abierta, d’escuela asturiana.